ଓଡ଼ିଶାରେ ଭାରତ ଯୋଡ଼ ନ୍ୟାୟ ଯାତ୍ରାର ୨ ଦିନ, ଆଜି ରାଉରକେଲାରେ ରାହୁଲଙ୍କ ପଦଯାତ୍ରା
ରାଉରକେଲା : ଭାରତ ଯୋଡ଼ ନ୍ୟାୟ ଯାତ୍ରାର ଆଜି ୨ୟ ଦିନ । ଆଜି ରାଉରକେଲାରୁ ଆରମ୍ଭ ହେବ ଭାରତ ଯୋଡୋ ନ୍ୟାୟ ଯାତ୍ରା । ବେଦବ୍ୟାସ ମନ୍ଦିରରେ ଦର୍ଶନ ସହ ଯାତ୍ରା ଆରମ୍ଭ କରିବେ ରାହୁଲ ଗାନ୍ଧି । ସେପଟେ ରାହୁଲ ଗାନ୍ଧୀଙ୍କ ଗସ୍ତ ନେଇ ଚଳଚଞ୍ଚଳ ଓଡିଶା କଂଗ୍ରେସ । ଦଳର ବରିଷ୍ଠ ନେତା ଓ କର୍ମୀମାନେ ସୁନ୍ଦରଗଡ଼ରେ କ୍ୟାମ୍ପ ପକାଇଛନ୍ତି । ଓଡିଶାରେ ଭାରତ ଯୋଡ଼ ନ୍ୟାୟ ଯାତ୍ରାକୁ କିପରି ସଫଳ କରିବେ । ସେନେଇ ସମସ୍ତେ ଏକ୍ଜୁଟ୍ ହୋଇ ଲାଗିପଡିଛନ୍ତି ।
ଉଦିତନଗରରୁ ପାନପୋଷ ଛକ ଯାଏ ୩ କିଲୋମିଟର ପଦଯାତ୍ରାରେ କରିବେ । ସେଠାରେ ସାଧାରଣ ସଭାକୁ ସମ୍ବୋଧିତ କରିବେ ରାହୁଲ । କଣ କହିବେ ଓ କାହାକୁ ଟାର୍ଗେଟ କରିବେ ତାଉପରେ ସମସ୍ତଙ୍କର ନଜର ରହିଛି । ଏହାପରେ ଅପରାହ୍ଣରେ ପୁନର୍ବାର ଯାତ୍ରା ଆରମ୍ଭ ହେବ । କୁତ୍ରା, ବଡ଼ଗାଁରେ ସ୍ବାଗତ ସମ୍ବର୍ଦ୍ଧନା କାର୍ଯ୍ୟକ୍ରମ ରହିଛି । ୧୪ କିଲୋମିଟର ଯାତ୍ରା ପରେ କୁତ୍ରାଠାରେ ଆଉ ଏକ ଜନସଭାକୁ ଉଦବୋଧନ ଦେବା କାର୍ଯ୍ୟକ୍ରମ ରହିଛି । ଏହାପରେ ୬୦ କିଲୋମିଟର ଦୂର ସୁନ୍ଦରଗଡ ବସଷ୍ଟାଣ୍ଡରେ ସାଢ଼େ ୪ଟାରେ ପହଞ୍ଚିବ ଭାରତ ଯୋଡୋ ନ୍ୟାୟ ଯାତ୍ରା । ସନ୍ଧ୍ୟାରେ ଜନସଭାକୁ ସମ୍ବୋଧିତ କରିବା କାର୍ଯ୍ୟକ୍ରମ ରହିଛି । ତାପରେ ଝାରସୁଗୁଡ଼ା ଅଭିମୁଖେ ବାହାରିବେ ରାହୁଲ ଗାନ୍ଧି । ଝାରସୁଗୁଡ଼ା ଆମଲିପଲୀ ଗ୍ରାଉଣ୍ଡରେ ରାତ୍ରି ରହଣି ରହିଛି ।
ଆସନ୍ତା କାଲି ସକାଳେ ଝାରସୁଗୁଡା ସହରାଞ୍ଚଳ, ବ୍ରଜରାଜନଗର, ବେଲପାହାଡ଼, ଲଖନପୁର ହୋଇ ଓଡିଶା – ଛାତିଶଗଡ଼ ସୀମା ରେଙ୍ଗାଲପାଲି ଯାଏ ଚାଲିବ କଂଗ୍ରେସର ଭାରତ ଯୋଡୋ ନ୍ୟାୟ ଯାତ୍ରା। ଏହାପରେ ଛତିଶଗଡ଼ ଯିବେ ରାହୁଲ ଗାନ୍ଧି । ରାହୁଲଙ୍କ ଗସ୍ତକୁ ନେଇ କଂଗ୍ରେସ ଶିବିର ଉତ୍ସାହିତ । ଗତକାଲି ଝାଡ଼ଖଣ୍ଡ ଦେଇ ସୁନ୍ଦରଗଡ଼ ଜିଲ୍ଲାରେ ପହଞ୍ଚିଥିଲା ଭାରତ ଯୋଡୋ ନ୍ୟାୟ ଯାତ୍ରା । ବୀରମିତ୍ରପୁରରେ ପହଞ୍ଚିଥିବା ପରେ ରାହୁଲ ଗାନ୍ଧିଙ୍କୁ ଭବ୍ୟ ସ୍ବାଗତ କରିଥିଲେ ଦଳୀୟ ନେତା ଓ କର୍ମୀ । ଆଗକୁ ସାଧାରଣ ନିର୍ବାଚନ ଥିବାରୁ ରାହୁଲଙ୍କ ଗସ୍ତ ପ୍ରଭାବ ପକାଇବ ବୋଲି ଆଶା ରଖିଛନ୍ତି ରାଜ୍ୟ କଂଗ୍ରେସ ନେତୃତ୍ବ ।
