ଏମକେସି ହାଇସ୍କୁଲ ପରିସରରେ ଦନ୍ତା ହାତୀ, ହଷ୍ଟେଲ ଛାତ୍ର ଭୟଭୀତ
ମୟୂରଭଞ୍ଜ : ଜଙ୍ଗଲ ଛାଡ଼ି ଜନବସତି ମୁହାଁ ହେଉଛନ୍ତି ଗଜରାଜ । ଏପରିକି ସହରରେ ମଧ୍ୟ ପଶିଲେଣି ହାତୀ । ଏହି ପରିପ୍ରେକ୍ଷୀରେ ପୁଣି ଥରେ ଦେଖିବାକୁ ମିଳିଛି ବାରିପଦା ସହରରେ । ସହର ମଝିରେ ଥିବା ଏମକେସି ହାଇସ୍କୁଲ ପରିସରରେ ଦନ୍ତା ହାତୀର ଉତ୍ପାତ ଯୋଗୁଁ ହଷ୍ଟେଲ ଛାତ୍ରମାନେ ଏକପ୍ରକାର ଭୟଭୀତ ହୋଇପଡିଥିଲେ ।
ସୂଚନା ଯେ, ଏମକେସି ହାଇସ୍କୁଲ ପରିସରରେ ଏକ ଦନ୍ତା ହାତୀ ବୁଲୁଥିବାର ଦେଖିବାକୁ ମିଳିଛି । ଗୁରୁବାର ଭୋରରୁ ସ୍କୁଲର ମୁଖ୍ୟ ଫାଟକକୁ ଲାଗି ରହିଥିବା ଛୋଟ ଫାଟକକୁ ଭାଙ୍ଗି ଭିତରକୁ ଯାଇଥିଲା ହାତୀ । ଖବର ପାଇ ବନ ବିଭାଗର ଏକ ଟିମ ହାତୀଟିକୁ ସେଠାରୁ କାଢି ପୁଣି ଜଙ୍ଗଲ ରେ ଛାଡିବାର ପ୍ରୟାସ ଜାରି ରଖିଛି । ତେବେ ପ୍ରାୟ ୮/୯ ଏକରର ସ୍କୁଲ ପରିସର ଭିତରେ ଅନେକ ଜଙ୍ଗଲିଆ ସ୍ଥାନ ଥିବାରୁ ହାତୀଟିକୁ କାବୁ କରିବା ସମ୍ଭବ ହୋଇ ନାହିଁ । ସ୍କୁଲର ବାହାରେ ଅନେକ ଲୋକ ଙ୍କ ଭିଡ ଥିବାରୁ ହାତୀଟିକୁ ସିଧା ସଳଖ ଘୋଉଡାଇବା ମଧ୍ୟ ବିପଜ୍ଜନକ ହେଉଛି । ତେବେ ନିଶ୍ଚେତକ ଦେଇ ହାତୀକୁ ଅଚେତ କରି ଉଦ୍ଧାର କରାଯିବାର ପ୍ରୟାସ ମଧ୍ୟ କରୁଛି ବନ ବିଭାଗ। ପୋଲିସ ଓ ବନ ବିଭାଗର ଅଧିକାରୀ ମାନେ ହାତୀ ଉପରେ ନଜର ରଖିଛନ୍ତି। ସେହିପରି ଉକ୍ତ ଅଞ୍ଚଳରେ କୌଣସି ବ୍ୟକ୍ତିଙ୍କୁ ଘରୁ ନ ବାହାରିବା ପାଇଁ ସଚେତନ କରାଉଛି ବନ ବିଭାଗ ।
