କମାଲ୍ ଦେଖାଇଲା ଥର୍ମାଲ୍ ଡ୍ରୋନ୍ କ୍ୟାମେରା, ରାତିରେ ଉଠାଇଲା ଅସୁସ୍ଥ ହାତୀଛୁଆର ଫଟୋ
କେନ୍ଦୁଝର : କମାଲ୍ ଦେଖାଇଲା ଥର୍ମାଲ୍ ଡ୍ରୋନ୍ କ୍ୟାମେରା। ରାତିରେ ଅସୁସ୍ଥ ହାତୀଛୁଆର ଫଟୋ ଉଠାଇବାରେ ହୋଇଛି ସକ୍ଷମ। ଅସୁସ୍ଥ ହୋଇଥିବା ମାତ୍ର ୭ ମାସର ହାତୀଛୁଆ ଆଗ ଡାହାଣ ଗୋଡ଼ ଛୋଟେଇ ଚାଲୁଥିବା ବେଳେ ଅସୁସ୍ଥ ହାତୀ ଛୁଆକୁ ଦୁଇପଟେ ଦୁଇଟି ହାତୀ ଜଗି ରହିଥିବାର ଚିତ୍ର ସ୍ପଷ୍ଟ ଭାବେ ରାତିରେ ଉଠାଇଛି ଥର୍ମାଲ୍ ଡ୍ରୋନ୍ କ୍ୟାମେରା। କେନ୍ଦୁଝର ସଦର ରେଞ୍ଜ ମୈଦାନକେଲ ସଂରକ୍ଷିତ ଜଙ୍ଗଲରେ ରାତି ସମୟରେ ଏଭଳି ବିରଳ ଫଟୋ ଉଠାଇବାରେ ସକ୍ଷମ ହୋଇଛି ଥର୍ମାଲ୍ ଡ୍ରୋନ୍ କ୍ୟାମେରା।
ଅସୁସ୍ଥ ହାତୀ ଛୁଆ ସମ୍ପର୍କରେ ଖବର ମିଳିବା ପରେ ତାହାର ଚିକିତ୍ସା ପାଇଁ ତତ୍ପର ହୋଇଉଠିଛି ବନ ବିଭାଗ। ଏନେଇ ବିଭାଗ ଅସୁସ୍ଥ ହାତୀ ଛୁଆକୁ ପୁନଃ ଠାବ କରିବାକୁ ଚେଷ୍ଟା କରୁଛି। ଗତ ୨ ଦିନ ଧରି ଏନେଇ ବନ ବିଭାଗ ୨ ଥର୍ମାଲ୍ ଡ୍ରୋନ୍ କ୍ୟାମେରା, ୧୫ ହାତୀ ସ୍କ୍ୱାର୍ଡ, ଗଜ ଉଦ୍ଧାରକାରୀ ଦଳ, ୨ ଜଣ ସହାୟକ ବନ ସଂରକ୍ଷକଙ୍କୁ ନିୟୋଜିତ କରିଥିଲେ ମଧ୍ୟ ଅସୁସ୍ଥ ହାତୀଛୁଆକୁ ଠାବ କରାଯାଇ ପାରୁନାହିଁ। ମୁଖ୍ୟତଃ ୧୨ ଟିକିଆ ହାତୀ ଦଳରେ ରହିଥିବା ମାଈ ହାତୀ ଏହି ଅସୁସ୍ଥ ହାତୀ ଛୁଆର ପାଖ ଛାଡୁ ନଥିବାରୁ ବନ ବିଭାଗ ପାଇଁ ଅସୁସ୍ଥ ହାତୀଛୁଆକୁ ଚିକିତ୍ସା କରିବା ସମ୍ଭବ ହୋଇପାରୁ ନାହିଁ ବୋଲି କେନ୍ଦୁଝର ବନଖଣ୍ଡ ଅଧିକାରୀ।
