ବାଲେଶ୍ୱର : ଦିନରେ ଗେଟ୍ ତାଲା ଭାଙ୍ଗି ଚୋରି, ସାଇଣ୍ଟିଫିକ ଟିମ୍ର ତଦନ୍ତ ଆରମ୍ଭ
ରୂପସା : ବାଲେଶ୍ୱର ଜିଲା ରୂପସା ଥାନା ଅନ୍ତର୍ଗତ ମିରିଗିମୁଣ୍ଡି ଗ୍ରାମର ବୀମା ଏଜେଣ୍ଟ ଗୌତମ କୁମାର ମହାନ୍ତିଙ୍କ ଘରୁ ଗୁରୁବାର ଦିନ ୧୦ ଟା ସମୟରେ ବଡ଼ ଧରଣର ଲୁଟ୍ ହୋଇଥିବା ଥାନାରେ ଅଭିଯୋଗ ହୋଇଛି । ବସ୍ତା ଏସ୍ଡିପିଓ ମାନସ କୁମାର ଦେଓ, ଥାନାଧିକାରୀ ସଚ୍ଚିଦାନନ୍ଦ ଗିରି, ଏଏସ୍ଆଇ ପୁମା ଦେଇ ଓ ଶେଖର ନାୟକ ପ୍ରମୁଖ ସାଇଣ୍ଟିଫିକ ଟିମ୍ ସହ ଘଟଣାସ୍ଥଳରେ ପହଞ୍ôଚ ତଦନ୍ତ ଜାରି ରଖିଛନ୍ତି ।
ଅଭିଯୋଗକାରୀ ଗୌତମ କୁମାର ମହାନ୍ତିଙ୍କ ସ୍ତ୍ରୀ ଓ ଦେଢ଼ ଶାଶୁ ଉଭୟ ଶିକ୍ଷୟିତ୍ରୀ ଅଟନ୍ତି । ଘରର ମୁଖ୍ୟ ଗେଟରେ ତାଲା ଦେଇ ସେ ତାଙ୍କ ସ୍ତ୍ରୀଙ୍କୁ ବାମଡ଼ା ସ୍କୁଲକୁ ଛାଡ଼ିବାକୁ ଯାଇଥିଲେ । ଦେଢ଼ ଶାଶୁ ନିଜ ସ୍କୁଟି ଯୋଗେ ସୁନ୍ଦରହତା ପ୍ରାଥମିକ ବିଦ୍ୟାଳୟକୁ ଯାଇଥିଲେ । ପୂର୍ବ ଯୋଜନା ମୁତାବକ ଦୁର୍ବୃତ୍ତମାନେ ରାଜପଥ ପାର୍ଶ୍ୱ ଚାଷ ଜମି ଦେଇ ବାଡ଼ ଭାଙ୍ଗି ପଶିଥିଲେ । ଗେଟ ତାଲା ଭାଙ୍ଗି ଦୁଇଟି ରୁମ୍ରେ ଥିବା ଦୁଇଟି ଗଡ଼ରେଜ ଲକ ଭାଙ୍ଗି ଗୋଟିଏ ସୁନା ହାର, ୬ ହଳ ସୁନା କାନ ଫୁଲ, ୫ଟି ସୁନା ମୁଦି ସହ ଉଠାଣ ହୋଇଥିବା ଦୁଇ ଜଣଙ୍କ ଦରମା ନଗଦ ଏକ ଲକ୍ଷ ୫ ହଜାର ଟଙ୍କା ଲୁଟ୍ କରି ଚମ୍ପଟ ମାରିଥିଲେ । ଅଭିଯୋଗକାରୀ ଘରକୁ ଆସି ଦେଖିବା ପରେ ଘଟଣା ସମ୍ପର୍କରେ ଗାଁ ଲୋକ ଓ ପୋଲିସକୁ ଖବର ଦେଇଥିଲେ । ଏ ସଂକ୍ରାନ୍ତରେ ପୋଲିସ ଏକ ମାମଲା ରୁଜୁ କରି ଛାନଭିନ ଆରମ୍ଭ କରିଛି ।
