ପୋଲରେ ପିଟି ହୋଇ ଜଳିଗଲା ତୀର୍ଥଯାତ୍ରୀ ବସ୍ : ୨୦ ମୃତ, ଅନେକ ଆହତ
ନୂଆଦିଲ୍ଲୀ: ସାଉଦି ଆରବର ମକ୍କା ସହରରେ ମର୍ମନ୍ତୁଦ ସଡ଼କ ଦୁର୍ଘଟଣା । ପୋଲରେ ପିଟି ହୋଇ ଜଳିଗଲା ତୀର୍ଥଯାତ୍ରୀ ବସ୍ । ଏଥିରେ ୨୦ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଯାତ୍ରୀ ଆହତ ହୋଇଛନ୍ତି । ଆହତଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି ।
ସାଉଦି ଆରବ ସରକାରୀ ଗଣମାଧ୍ୟମର ସୂଚନା ଅନୁସାରେ, ଦକ୍ଷିଣ ସୁବାର ଅସିର୍ ଅଞ୍ଚଳରେ ଗତ ସୋମବାର ଏକ ତୀର୍ଥଯାତ୍ରୀ ବସ୍ ଦୁର୍ଘଟଣାଗ୍ରସ୍ତ ହୋଇଛି । ମକ୍କା ଓ ମଦିନା ସହରକୁ ଏକ ତୀର୍ଥଯାତ୍ରୀ ବସ୍ ଯାଉଥିବା ବେଳେ ଭାରସାମ୍ୟ ହରାଇ ଏକ ପୋଲରେ ପିଟି ହୋଇଥିଲା । ପରେ ଏହି ବସ୍ଟିରେ ନିଆଁ ଲାଗିଯାଇଥିଲା। ଏହି ଦୁର୍ଘଟଣାରେ ୨୦ଜଣଙ୍କ ମୃତ୍ୟୁ ହୋଇଥିବା ବେଳେ ପ୍ରାୟ ୨୯ରୁ ଅଧିକ ତୀର୍ଥଯାତ୍ର ଆହତ ହୋଇଛନ୍ତି । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଆହତ ଯାତ୍ରୀଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଇଛନ୍ତି ।
ପୋଲିସ୍ ସୂଚନା ଅନୁଯାୟୀ, ମୃତକ ତୀର୍ଥଯାତ୍ରୀ ଭିନ୍ନ ଭିନ୍ନ ଦେଶର ବୋଲି ଜଣାପଡ଼ିଛି । ହେଲେ ସେମାନଙ୍କର କୌଣସି ସୂଚନା ମିଳିପାରି ନାହିଁ । ସେହିପରି ବସ୍ ଦୁର୍ଘଟଣା ବ୍ରେଲ୍ ଫେଲ୍ ଯୋଗୁ ହୋଇଛି ବୋଲି ସୂଚନା ମିଳିଛି ।
