ଆଜି ଠାରୁ ଦୁଇଦିନିଆ ଭାରତ ଗସ୍ତରେ ଆସିବେ ଜର୍ମାନୀ ଚାନସେଲର୍ ଓଲାଫ ସ୍କୋଲଜ, ସାମିଲ ରହିବେ ଉଚ୍ଚସ୍ତରୀୟ ବ୍ୟବସାୟିକ ପ୍ରତିନିଧି ଦଳ
ନୂଆଦିଲ୍ଲୀ : ଜର୍ମାନୀ ଚାନସେଲର୍ ଓଲାଫ ସ୍କୋଲଜ ଆଜି ଠାରୁ ଦୁଇଦିନିଆ ଭାରତ ଗସ୍ତରେ ଆସୁଛନ୍ତି । ତାଙ୍କ ସହ ଜର୍ମାନୀର ଏକ ଉଚ୍ଚସ୍ତରୀୟ ବ୍ୟବସାୟିକ ପ୍ରତିନିଧି ଦଳ ମଧ୍ୟ ଭାରତ ଆସୁଛନ୍ତି । ରାଷ୍ଟ୍ରପତି ଭବନ ପ୍ରାଙ୍ଗଣରେ ତାଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ଜ୍ଞାପନ କରାଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଜର୍ମାନୀ ଚାନସେଲର୍ ଅନେକ ଦ୍ୱିପାକ୍ଷିକ, ଆଂଚଳିକ ଓ ଆନ୍ତର୍ଜାତିକ ପ୍ରସଙ୍ଗ ଉପରେ ଆଲୋଚନା କରିବେ । ଉଭୟ ନେତା ଦୁଇ ଦେଶର ଉଦ୍ୟୋଗପତିମାନଙ୍କ ସହ ବାର୍ତାଳାପ କରିବେ। ଚାନସେଲର୍ ସ୍କୋଲଜ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିବାର କାର୍ଯ୍ୟସୂଚୀ ରହିଛି। ଜର୍ମାନୀ ଚାନସେଲର୍ ଭାବେ ଶ୍ରୀ ସ୍କୋଲଜଙ୍କର ଏହା ପ୍ରଥମ ଭାରତ ଗସ୍ତ।
ଭାରତ-ଜର୍ମାନୀ ଭାଗିଦାରୀ ସଂପର୍କ ପାରସ୍ପରିକ ମୂଲ୍ୟବୋଧ, ବିଶ୍ୱାସ ଓ ବୁଝାମଣା ଉପରେ ପର୍ଯ୍ୟବେଶିତ। ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ସଂପର୍କର ବିକାଶ ପାଇଁ ବାଣିଜ୍ୟିକ ସଂପର୍କ, ସବୁଜ ତଥା ସ୍ଥାୟୀ ବିକାଶ କ୍ଷେତ୍ରରେ ସହଯୋଗ ଓ ଜନସଂପର୍କ ବୃଦ୍ଧି ମୁଖ୍ୟ ଭୂମିକା ଗ୍ରହଣ କରିଛି । ଭାରତ ଓ ଜର୍ମାନୀ ବହୁରାଷ୍ଟ୍ରୀୟ ମଂଚରେ ପରସ୍ପର ସହ ଘନିଷ୍ଠତାର ସହ କାର୍ଯ୍ୟ କରି ଆସୁଛନ୍ତି । ଜର୍ମାନୀ ଚାନସେଲରଙ୍କର ଏହି ଗସ୍ତ ଷଷ୍ଠ ଆନ୍ତଃ ସରକାରୀ କଥାବାର୍ତ୍ତାର ଅଗ୍ରଗତି ବିଷୟରେ ଜାଣିବାର ସୁଯୋଗ ପ୍ରଦାନ କରିବା ସହ ନିରାପତ୍ତା ଓ ପ୍ରତିରକ୍ଷା ସହଯୋଗ ବୃଦ୍ଧି କରିବ, ଉଭୟ ପକ୍ଷ ମଧ୍ୟରେ ଅର୍ଥନୈତିକ ସମ୍ପର୍କ ବୃଦ୍ଧି କରିବ, ଉଭୟ ଦେଶର ପ୍ରତିଭାଶାଳୀ ପେଷାଦାରମାନଙ୍କର ଆଦାନପ୍ରଦାନ ପାଇଁ ସୁଯୋଗ ସୃଷ୍ଟି କରିବ ଓ ବିଜ୍ଞାନ ଏବଂ ବୈଷୟିକଜ୍ଞାନ କ୍ଷେତ୍ରରେ ସଂପ୍ରତି ଥିବା ସହଯୋଗକୁ ବୃଦ୍ଧି କରିବ । ଜର୍ମାନୀ ଚାନସେଲର୍ ୨୬ ତାରିଖରେ ବେଙ୍ଗାଲୁରୁ ଗସ୍ତରେ ଯିବେ ।
