ବାଲି ଟ୍ରାକ୍ଟର-ବାଇକ୍ ଧକ୍କା : ୧ ମୃତ, ୩ ଗୁରୁତର
ଜଳେଶ୍ୱର : ଆଜି ଏକ ଚୋରା ବାଲି ଟ୍ରାକ୍ଟର ଦ୍ରୁତ ବେଗରେ ଗଲାବେଳେ ବାଇକ୍ ସହିତ ଧକ୍କା ଲାଗି ଜଣେ ଯୁବକ ମୃତ ଓ ୩ ଜଣ ଗୁରୁତର ହୋଇ ବାଲେଶ୍ୱର ସ୍ଥାନାନ୍ତର ହୋଇଛନ୍ତି । ଚୋରା ବାଲି ଟ୍ରାକ୍ଟର ଉପରେ ପ୍ରଶାସନର ଅଂକୁଶ ରହୁନଥିବାରୁ ବ୍ୟାପକ ବାଲି ଚାଲାଣ ଓ ବେପାରୁଆ ଗାଡି ଚାଳନା ହୋଇ ଆସୁଛି । ଘଟଣାରୁ ପ୍ରକାଶ ଆଜି ଅପରାହ୍ନରେ ଗାଁ ଲକ୍ଷ୍ମଣନାଥ ଅଂଚଳରୁ ଏକ ବାଲି ବୋଝେଇ ଟ୍ରାକ୍ଟର ଦ୍ରୁତ ଗତିରେ ୬୦ ଜାତୀୟ ରାଜପଥ ଆଡେ ଗଲାବେଳେ ଅଗ୍ରୱାଲ ସ୍କୁଲ ନିକଟ ଦିଗାମ୍ବର ରାଉଳ ଘର ସମ୍ମୁଖରେ ବାଇକ୍କୁ ଧକ୍କା ଦେଇଥିଲା । ୩ ଯୁବକ ଓ ଜଣେ ନାବାଳକ ପଶ୍ଚିମବଂଗରୁ କ୍ରିକେଟ ଖେଳ ସାରି ଫେରୁଥିବା ବେଳେ ଏପରି ଦୁର୍ଘଟଣା ଘଟିଥିଲା । ୨ଟି ବାଇକ୍ରେ ଯୁବକମାନେ ଫେରୁଥିବା ବେଳେ ଏପରି ଦୁର୍ଘଟଣା ଘଟିବାରୁ ବାଲି ଟ୍ରାକ୍ଟର ଡ୍ରାଇଭର ଗାଡି ସହ ଫେରାର ହୋଇ ଯାଇଛି । ଅନ୍ୟପକ୍ଷରେ ଗୁରୁଦାସ ପୁର ଗାଁ ପିଣ୍ଟ ଓରଫ ପ୍ରମୋଦ ମହାପାତ୍ର (୧୮) ଅତି ଗୁରୁତର ଥିବାରୁ ତାଙ୍କୁ ୧୦୮ ଆମ୍ବୁଲାନ୍ସରେ ଜିକେଭଟ୍ଟର ହସ୍ପିଟାଲକୁ ପଠାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଲକ୍ଷ୍ମଣନାଥ ଗାଁର ଅଭିନନ୍ଦନ ଦାସ (୧୪), ପିତାମ୍ବର ହେମ୍ବ୍ରମ (୨୦) ଓ ପ୍ରଦୀପ ଗୋଚ୍ଚାୟତ (୨୦) ମୁମୁର୍ଷୁଭାବେ ଘଟଣାସ୍ଥଳରେ ପଡି ରହିଥିବା ବେଳେ ଚନ୍ଦନ କରଙ୍କ ସହଯୋଗରେ ଗ୍ରାମବାସୀମାନେ ଜିକେ ଭଟ୍ଟର ହସ୍ପିଟାଲକୁ ପଠାଇଥିଲେ । ସେମାନଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ବାଲେଶ୍ୱର ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି ।
