୪ର୍ଥ ଟେଷ୍ଟ : ରୋହିତଙ୍କ ଶତକ, ପୂଜାରାଙ୍କ ଅର୍ଦ୍ଧଶତକ
- ବିଦେଶ ମାଟିରେ ରୋହିତ ଶର୍ମାଙ୍କ ପ୍ରଥମ ଟେଷ୍ଟ ଶତକ
- ଛକା ମାରି ସେଞ୍ଚୁରୀ ପୁରଣ କଲେ ହିଟ୍ ମ୍ୟାନ୍
ଓଭାଲ : ଭାରତ-ଇଂଲଣ୍ଡ ମଧ୍ୟରେ ଚତୁର୍ଥ ଟେଷ୍ଟ ମ୍ୟାଚ ଓଭାଲରେ ଜାରି ରହିଛି । ଦ୍ବିତୀୟ ଇନିଂସରେ ମଜବୁତ ସ୍ଥିତି ଆଡକୁ ଅଗ୍ରସର ହେଉଛି ଭାରତ । ରୋହିତ ଶର୍ମା ଏବଂ ଚେତେଶ୍ବର ପୁଜାରା ଉଭୟ, ଇଂଲଣ୍ଡ ବୋଲରମାନଙ୍କୁ ଧରାଶୟୀ କରିଛନ୍ତି । ଯାହା ଫଳରେ ଇଂଲଣ୍ଡ ବିପକ୍ଷରେ ଦମଦାର ସ୍ଥିତିକୁ ଫେରିଛି । ଏହାରି ମଧ୍ୟରେ ଆଉ ଏକ ରେକର୍ଡ କରିଛନ୍ତି ଭେଟେରାନ୍ ରୋହିତ ଶର୍ମା । ବିଦେଶ ମାଟିରେ ପ୍ରଥମ ଥର ପାଇଁ ଶତକ ହାସଲ କରି ବ୍ୟାଟିଂ କରୁଛନ୍ତି ରୋହିତ । ଅନ୍ୟପଟେ ତାଙ୍କୁ ଭରପୁର ସହାୟତା ଦେଉଛନ୍ତି ଅଭିଜ୍ଞ ଚେତେଶ୍ବର ପୁଜାରା । ଉଭୟ ବ୍ୟାଟ୍ସମ୍ୟାନ୍ କ୍ରିଜ୍ରେ ଜମି ରହିବା ସହିତ ଇଂଲଣ୍ଡର ବୋଲରମାନଙ୍କୁ ବେଦମ କରିସାରିଲେଣି । ରୋହିତ ଏବଂ ପୁଜାରାଙ୍କ ଶତକୀୟ ଭାଗିଦାରୀ ବଳରେ ଚା’ ପାନ ବିରତି ସୁଦ୍ଧା ଭାରତ ୧ ଓ୍ବିକେଟ୍ ହରାଇ ୧୯୯ ରନ ସଂଗ୍ରହ କରିଛି । ଭାରତ ପକ୍ଷରୁ ଲୋକେଶ ରାହୁଲ ଏକ ମାତ୍ର ବ୍ୟାଟ୍ସମ୍ୟାନ ଭାବେ ୪୬ ରନ କରି ଆଉଟ ହୋଇଛନ୍ତି ।
ରୋହିତ ଶର୍ମା ୧୦୩ ରନ କରି ବ୍ୟାଟିଂ ଜାରି ରଖିଥିବା ବେଳେ ପୁଜାରା ୪୮ ରନ କରି ଖେଳୁଛନ୍ତି । ପ୍ରଥମ ଇନିଂସରେ ଭାରତ ୧୯୧ ରନରେ ଅଲଆଉଟ ହୋଇଯିବା ପରେ ଇଂଲଣ୍ଡ ୨୯୦ ରନ କରିଥିଲା । ଯାହାଫଳରେ ପ୍ରଥମ ଇନିଂସରେ ୯୯ରନରେ ଆଗୁଆ ରହିଥିଲା ଘରୋଇ ଟିମ । ଜବାବରେ ଦ୍ବିତୀୟ ଦିନ ଭାରତ କୌଣସି ଓ୍ବିକେଟ ନହରାଇ ୪୩ ରନ କରିପାରିଥିଲା । ତୃତୀୟ ଦିନ ଖେଳ ଆରମ୍ଭରୁ ଉଭୟ ରାହୁଲ ଏବଂ ରୋହିତ ଭଲ ଆରମ୍ଭ କରିଥିଲେ । ରାହୁଲ ଆଉଟ ହେବା ପରେ ପୁଜାରା ମଧ୍ୟ ରୋହିତଙ୍କୁ ଭରପୁର ସହାୟତା ଦେଉଛନ୍ତି । ତୃତୀୟ ଦିନ ଖେଳ ଜାରି ରହିଥିବା ବେଳେ ଭାରତର ସ୍କୋର ୬୯ ଓଭରରେ ୧ ଓ୍ବିକେଟ ହରାଇ ୧୯୯ ରନ ରହିଛି । ବର୍ତ୍ତମାନ ସୁଦ୍ଧା ଇଂଲଣ୍ଡ ଠାରୁ ୧୦୦ରନରେ ଆଗୁଆ ରହିଛି ଭାରତ । ଇଂଲଣ୍ଡ ପକ୍ଷରୁ ଜେମସ୍ ଆଣ୍ଡରସନ ଏକମାତ୍ର ଓ୍ବିକେଟ ନେବାରେ ସଫଳ ହୋଇଛନ୍ତି ।
