ଅର୍ପିତା ମୁଖାର୍ଜୀଙ୍କ ଆଉ ଏକ ଘରୁ ମିଳିଲା ୨୭କୋଟି ୯୦ଲକ୍ଷ ଟଙ୍କା ଓ ପ୍ରାୟ ୫ କିଲୋଗ୍ରାମ ସୁନା

ଟଙ୍କା ଗଣିବା ପାଇଁ ମଗାଇବାକୁ ପଡ଼ିଲା ୫ଟି ମେସିନ

କୋଲକାତା : ପଶ୍ଚିମବଙ୍ଗ ଶିକ୍ଷକ ନିଯୁକ୍ତି ଦୁର୍ନୀତି ମାମଲାର ତଦନ୍ତରେ ନିୟୋଜିତ ପ୍ରବର୍ତ୍ତନ ନିର୍ଦ୍ଦେଶାଳୟ ଟିମ୍ ଆଉ ଏକ ନୋଟ୍ ପାହାଡ଼ ଜବତ କରିଛି । ଇଡି ନୂତନ ଟ୍ରେଜେରୀରୁ ୨୭କୋଟି ୯୦ଲକ୍ଷ ଟଙ୍କା ଓ ପ୍ରାୟ ୫ କିଲୋଗ୍ରାମ ସୁନା ଜବତ କରିଛି । ପାର୍ଥ ଚାଟାର୍ଜୀ ଓ ଅର୍ପିତା ମୁଖାର୍ଜୀଙ୍କ କଳା ଧନ ରହସ୍ୟର ଦ୍ୱିତୀୟ ଦ୍ୱାର ଖୋଲିଛି ଇଡି, ପ୍ରଥମେ ଟଲିଗୁଞ୍ଜ ଓ ବର୍ତ୍ତମାନ ବେଲଘରିଆ । ଏହା ହେଉଛି ଅର୍ପିତା ମୁଖାର୍ଜୀଙ୍କ ଦ୍ୱିତୀୟ ଫ୍ଲାଟ ଯେଉଁଠାରୁ ଗଦା ଗଦା ଗୋଲାପୀ ନୋଟ ଜବତ କରାଯାଇଛି । ନୋଟ୍ ଗୁଡିକ ପ୍ଲାଷ୍ଟିକ୍ ବ୍ୟାଗରେ ରଖାଯାଇଥିଲା ।

ଏହି ନଗଦ ଗଣିବା ପାଇଁ ଅନେକ ମେସିନ୍ ମଗା ଯାଇଥିଲା । ଏଠାରୁ ଇଡି ନଗଦ ୨୭କୋଟି ୯୦ ଲକ୍ଷ ଟଙ୍କା ପାଇଛି, ଯାହାକୁ ଗଣା ଯାଇଥିଲା । ଏହାସହ ପ୍ରାୟ ୫ କିଲୋଗ୍ରାମ ସୁନା ମଧ୍ୟ ଜବତ କରାଯାଇଛି । ଅର୍ପିତା ମୁଖାର୍ଜୀଙ୍କ ନାମରେ ଏପରି ଦୁଇଟି ଫ୍ଲାଟ ଅଛି, ସେଥି ମଧ୍ୟରୁ ଏହା ହେଉଛି ବ୍ଲକ-୫ ଯାହା ବେଲଘରିଆର ରଥାଲା ଅଞ୍ଚଳର ବ୍ଲକ ନମ୍ବର-୫ରେ ରହିଛି । ପଶ୍ଚିମବଙ୍ଗ ଶିକ୍ଷକ ଭର୍ତ୍ତି ଦୁର୍ନୀତିର ମୁଖ୍ୟ ଅଭିଯୁକ୍ତି ମନେ କରାଯାଉଥିବା ମନ୍ତ୍ରୀ ପାର୍ଥ ଚାଟାର୍ଜୀ ଓ ଅର୍ପିତା ମୁଖାର୍ଜୀ ଇଡି ହେପାଜତରେ ଅଛନ୍ତି । ଇଡି ଟିମ୍ ପାଇଁ ପାର୍ଥ ଚାଟାର୍ଜୀଙ୍କ ମୁହଁ ଖୋଲିବା କଷ୍ଟସାଧ୍ୟ ହୋଇପଡ଼ିଛି, କିନ୍ତୁ ଅର୍ପିତା ମୁଖାର୍ଜୀ କ୍ରମାଗତ ଭାବେ କଳା ଟଙ୍କାର ରହସ୍ୟ ଉନ୍ମୋଚନ କରୁଛନ୍ତି । ମିଳିଥିବା ସୂଚନା ଅନୁଯାୟୀ ଅର୍ପିତା କୋଲକାତା ଆଖପାଖରେ ଥିବା ତାଙ୍କ ସମ୍ପତ୍ତି ବିଷୟରେ ଇଡିଙ୍କୁ ସୂଚନା ଦେଇଛନ୍ତି ।

ଇଡି ବେଲଘରିଆ ଅଞ୍ଚଳରେ ଅର୍ପିତା ମୁଖାର୍ଜୀଙ୍କ ଦୁଇଟି ଫ୍ଲାଟ ଉପରେ ଚଢ଼ାଉ କରିଛି । ଗୋଟିଏ ଫ୍ଲାଟରୁ ୨ କୋଟି ଟଙ୍କା ମୂଲ୍ୟର ଅଳଙ୍କାର ଜବତ କରାଯାଇଛି । ଫ୍ଲାଟର ତଲାସୀ ସମୟରେ ଅନେକ ଗୁରୁତ୍ୱପୂର୍ଣ୍ଣ ଦସ୍ତାବିଜ ମଧ୍ୟ ଉଦ୍ଧାର କରାଯାଇଛି । ଜବତ ହୋଇଥିବା ନୋଟଗୁଡ଼ିକୁ ନେବା ପାଇଁ ଅନେକ ବାକ୍ସ ମଗାଯାଇଥିଲା । ପଶ୍ଚିମବଙ୍ଗର ରାଜନୀତିରେ ଶିକ୍ଷକ ଦୁର୍ନୀତିକୁ ନେଇ ହଇଚଇ ସୃଷ୍ଟି ହୋଇଛି । ଏହା ହଜାର କୋଟିରୁ ଅଧିକ ଦୁର୍ନୀତି ବୋଲି ବିଜେପି ଦାବି କରିଛି ।

ଏହି ଘୋଟାଲାର ଖୁଲାସା ପରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପାଇଁ ବଡ଼ ସମସ୍ୟା ଉପୁଜିଛି । ପାର୍ଥ ଚାଟାର୍ଜୀଙ୍କ ଗିରଫ ମମତାଙ୍କ ଅସୁବିଧା ବଢ଼ାଇ ଦେଇଛି । ବିଜେପି ନେତା ଦିଲୀପ ଘୋଷ ଦାବି କରିଛନ୍ତି ଯେ, ଶିକ୍ଷକ ଦୁର୍ନୀତି ୪୦-୫୦ କୋଟି ଟଙ୍କାର ନୁହେଁ ବରଂ ୧୦୦ କୋଟିରୁ ଅଧିକ । ଏହି ଘୋଟାଲା ବିରୋଧରେ ଆଜି ପଶ୍ଚିମ ବଙ୍ଗ ବିଜେପି ଏକ ରାଲି କରିବ । ଦିନ ୧ଟାରେ କଲେଜ ସ୍କୋୟାରର ଧର୍ମତଲା ପର୍ଯ୍ୟନ୍ତ ଦଳ ମାର୍ଚ୍ଚ କରିବ ।