୨୦୪୬ରେ ପୃଥିବୀ ସହ ଧକ୍କା ହେବ ‘୨୦୨୩ ଡିଡବ୍ଲ୍ୟୁ’
ନୂଆଦିଲ୍ଲୀ : ୨୦୪୬ରେ ପୃଥିବୀରେ ଧକ୍କା ହୋଇପାରେ ଗ୍ରହାଣୁ । ନାସାର ବୈଜ୍ଞାନିକ ମାନେ ଏକ ଗ୍ରହାଣୁ ଆବିଷ୍କାର କରିଛନ୍ତି । ଗ୍ରହାଣୁର ନାଁ ‘୨୦୨୩ ଡିଡବ୍ଲ୍ୟୁ’ । ନାସାର ଆଷ୍ଟରଏଡ୍ ୱାଚ୍ ଅନୁସାରେ, ଏହି ଗ୍ରହାଣୁର ବ୍ୟାସ ପ୍ରାୟ ୪୯.୨୯ ମିଟର । ନାସାର ପ୍ଲାନେଟାରୀ ଡିଫେନ୍ସ କୋଅର୍ଡିନେସନ୍ କାର୍ଯ୍ୟାଳୟ ଅନୁସାରେ, ଆଗାମୀ ୨୩ ବର୍ଷ ଅର୍ଥାତ ୨୦୪୬ ମସିହା ଫେବୃଆରୀ ୧୪ ତାରିଖ ଦିନ ପୃଥିବୀ ସହ ଏହା ଧକ୍କା ହେବାର ଆଶଙ୍କା ରହିଛି । ନାସା ଜେଟ୍ ପ୍ରପଲସନ୍ ଲାବୋରେଟିରୀର ସେଣ୍ଟ୍ରି ସିଷ୍ଟମ ଜରିଆରେ ୟୁରୋପୀୟ ମହାକାଶ ସଂସ୍ଥାର ତଥ୍ୟ ଆଧାରରେ, ଏହି ଗ୍ରହାଣୁ ପୃଥିବୀରେ ଧକ୍କା ହେବାର ଆଶଙ୍କା ୬୨୫ରେ ୧ ।
ଗତ ମାସ ୨୬ ତାରିଖରେ ଏହି ଗ୍ରହାଣୁ ଚିହ୍ନଟ ହୋଇଥିଲା । ପୃଥିବୀଠାରୁ ଏହାର ଦୂରତା ୦.୧୨ ଆଷ୍ଟ୍ରୋନୋମିକାଲ ୟୁନିଟ୍ ଥିଲା । ପଋଥିବୀର କେନ୍ଦ୍ର ଓ ସୂର୍ଯ୍ୟର କେନ୍ଦ୍ର ମଧ୍ୟରେ ଥିବା ହାରାହାରି ଦୂରତା ହେଉଛି ଆଷ୍ଟ୍ରୋନୋମିକାଲ ୟୁନିଟ୍ । ଗ୍ରହାଣୁଟି ପୃଥିବୀଠାରୁ ପ୍ରାୟ ୧୮ ନିୟୁତ କିମି ଦୂରରେ ସେକେଣ୍ଡ ପିଛା ୨୪.୬୪ କିମି ବେଗରେ ଗତି କରୁଛି । ସୂର୍ଯ୍ୟଙ୍କ ଚତୁପାଶ୍ୱରେ ପୂର୍ଣ୍ଣ ପରିକ୍ରମା କରିବାକୁ ଏହାକୁ ୨୭୧ ଦିନ ଲାଗୁଛି । ୨୦୪୭ ଓ ୨୦୫୪ ମସିହା ମଧ୍ୟରେ ଆଉ ୯ଟି ଗ୍ରହାଣୁ ପୃଥିବୀର ନିକଟତର ହେବ ବୋଲି ନାସା କହିଛି । ସେପଟେ ନାସା କହିବା ଅନୁସାରେ, ଏହି ଗ୍ରହାଣୁ ପୃଥିବୀରେ ଧକ୍କା ହେବାର ଆଶଙ୍କା ବହୁତ କମ୍ । ବୈଜ୍ଞାନିକମାନେ ଭବିଷ୍ୟତ ବିଷୟରେ ନିଶ୍ଚିତ ନୁହଁନ୍ତି । ୨୦୨୩ ଡିଡବ୍ଲ୍ୟୁ ଗ୍ରହାଣୁକୁ ୟୁରୋପୀୟ ମହାକାଶ ସଂସ୍ଥା ବିପଦ ତାଲିକାର ଶୀର୍ଷରେ ରଖିଛି । ନାସାର ଜେଟ ପ୍ରପଲସନ୍ ଲାବୋରେଟୋରୀ ଅନୁସାରେ, ଟୋରୋନୋ ସ୍କେଲରେ ଗ୍ରହାଣୁକୁ ବର୍ତ୍ତମାନ ପ୍ରଥମ ସ୍ତରରେ ରଖାଯାଇଛି ।
