କାଜାନ୍ ସହରର ଏକ ବିଦ୍ୟାଳୟରେ ଗୁଳିକାଣ୍ଡ, ୧୧ ମୃତ
ମସ୍କୋ : ଦକ୍ଷିଣପଶ୍ଚିମ ଋଷିଆର ତାତାରସ୍ତାନ ରାଜ୍ୟର ରାଜଧାନୀ କାଜାନ୍ ସହରରେ ଥିବା ଏକ ସ୍କୁଲରେ ମଙ୍ଗଳବାର ଗୁଳିକାଣ୍ଡ ଘଟିବାରୁ ୧୦ଜଣ ସ୍କୁଲ ପିଲା ଓ ଜଣେ ଶିକ୍ଷକ ପ୍ରାଣ ହରାଇଛନ୍ତି । କେତେକ ଛାତ୍ରଛାତ୍ରୀମଧ୍ୟ ଆହତ ହୋଇଛନ୍ତି ।
ଋଷର ସ୍ପୁଟନିକ ନ୍ୟୁଜ ଏଜେନ୍ସିର ତଥ୍ୟ ମୁତାବକ ମଙ୍ଗଳବାର ବିଦ୍ୟାଳୟ ଚାଲିଥିବା ବେଳେ ଦୁଇଜଣ ଅଜଣା ବନ୍ଧୁକଧାରୀ ବିଦ୍ୟାଳୟରେ ପ୍ରବେଶକରି ଏକ ବୋମା ବିସ୍ଫୋରଣ କରିବାସହ ପିଲାମାନଙ୍କ ଉପରକୁ ଆଖିବୁଜା ଗୁଳି ଚଳାଇଥିଲେ । ଏଥିରେ ୧୦ଜଣ ସ୍କୁଲ ପିଲା ଓ ଜଣେ ଶିକ୍ଷକ ପ୍ରାଣ ହରାଇଛନ୍ତି । କେତେକ ଛାତ୍ର/ଛାତ୍ରୀଙ୍କ ମଧ୍ୟରୁ ଦୁଇଜଣ ଭୟରେ ବିଦ୍ୟାଳୟ କୋଠାରୁ ଡେଇପଡିବାରୁ ସେମାନେ ପ୍ରାଣ ହରାଇଛନ୍ତି । ଖବରପାଇ ସ୍ଥାନୀୟ ପୋଲିସ୍ ସ୍କୁଲ ଉପରେ ଚଢାଉକରି ଦୁଇଜଣ ବନ୍ଧୁକଧାରୀଙ୍କୁ ହତ୍ୟା କରିଛି । ଏହି ବନ୍ଧୁକଧାରୀଙ୍କ ମଧ୍ୟରୁ ଜଣକର ବୟସ ୧୯ବର୍ଷ ଓ ତା ନିକଟରେ ଏକ ଲାଇସେନ୍ସ ପ୍ରାପ୍ତ ବନ୍ଧୁକ ଥିଲା । ଋଷ ରାଷ୍ଟ୍ରପତି ଭ୍ଲାଦିମିର ପୁତିନ୍ ଏହି ଘଟଣାରେ ଗଭୀର ଦୁଃଖ ପ୍ରକାଶ କରିବାସହ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ।
