ବାଲେଶ୍ୱର : ୧୦ ଗ୍ରାମ୍ ବ୍ରାଉନ୍ସୁଗାର ଜବତ, ଜଣେ ଗିରଫ
ବାଲେଶ୍ୱର : ବାଲେଶ୍ୱର ଜିଲାରେ ଦିନକୁ ଦିନ ଆଇନଶୃ୍ଙ୍ଖଳା ପରିସ୍ଥିତି ଅବନତି ହେବାରେ ଲାଗିଛି । ଜିଲାରେ ଗୋ-ଚାଲାଣ, ଗଞ୍ଜେଇ, ବ୍ରାଉନ୍ସୁଗର, ବନ୍ଧୁକ କାରବାର ଆଦି ଦିନକୁ ଦିନ ବୃଦ୍ଧି ପାଉଥିବାରୁ ଏହା ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଅପରାଧ ଓ ଅପରାଧୀଙ୍କ ବିରୋଧରେ ପୋଲିସ ଆଖିଦୃଶିଆ କାର୍ଯ୍ୟାନୁଷ୍ଠାନ ନେଇପାରୁ ନଥିବାରୁ ଆଇନଶୃଙ୍ଖଳା ବିପର୍ଯ୍ୟସ୍ତ ହେବାର ଏହାହିଁ ପ୍ରମୁଖ କାରଣ ବୋଲି ସାଧାରଣରେ ଆଲୋଚନା ହେଉଛି । ଏହି ପରିପ୍ରେକ୍ଷୀରେ ମଙ୍ଗଳବାର ବସ୍ତା ଅଂଚଳରୁ ୧୦ ଗ୍ରାମ୍ ଓଜନର ବ୍ରାଉନ୍ସୁଗାର ଜବତ କରାଯିବା ସହ ଜଣଙ୍କୁ ଗିରଫ କରାଯାଇଛି ।
ସୂଚନା ଯେ, ବସ୍ତା ଦମକଳକେନ୍ଦ୍ର ନିକଟରେ ବ୍ରାଉନ୍ସୁଗାର ବିକ୍ରିର ମସୁଧା ସମୟରେ ବସ୍ତା ପୋଲିସ ମଙ୍ଗଳବାର ଚଢ଼ାଉ କରି ହସିମ୍ ରେଜା କାଦ୍ରି (୨୫)ଙ୍କ ଠାରୁ ୧୦ ଗ୍ରାମ୍ ବ୍ରାଉନ୍ସୁଗାର ସହ ତାଙ୍କୁ ଗିରଫ କରିଥିଲେ । ଜବତ ବ୍ରାଉନ୍ସୁଗାରର ଆନୁମାନିକ ମୂଲ୍ୟ ୧୦ଲକ୍ଷ ଟଙ୍କା ହେବ । ଅଭିଯୁକ୍ତ ରାଜା ବିରୁଦ୍ଧରେ ବିଭିନ୍ନ ଦଫାରେ ମାମଲା ରୁଜୁ କରି ଥାନା ଆଇଆଇସି ସୁବ୍ରତ କୁମାର ବେହେରା କୋର୍ଟ ଚାଲାଣ କରିଚନ୍ତି ।
