ଉତ୍ତେଜନାମୂଳକ ବୟାନକୁ ନେଇ ଆକ୍ସନ ମୁଡ଼ରେ ପୋଲିସ; ଓୱେସି ଓ ନରସିଂହାନନ୍ଦଙ୍କ ବିରୋଧରେ ମାମଲା ରୁଜୁ
ନୂଆଦିଲ୍ଲୀ : ଉତ୍ତେଜନାମୂଳକ ବୟାନ ତଥା ସୋସିଆଲ ମିଡିଆରେ ଘୃଣାର ବାର୍ତ୍ତା ବିସ୍ତାର ପ୍ରସଙ୍ଗରେ ଦିଲ୍ଲୀ ପୋଲିସ ଏକ ବଡ ପଦକ୍ଷେପ ନେଇଛି । ଦିଲ୍ଲୀ ପୋଲିସର ଆଇଏଫଏସଓ ୟୁନିଟ୍ ମଧ୍ୟ ଅସାଦୁଦ୍ଦିନ ଓୱେସି ଏବଂ ସ୍ୱାମୀ ନରସିଂହାନନ୍ଦଙ୍କ ବିରୋଧରେ ଉତ୍ତେଜନାମୂଳକ ଭାଷଣ ଦେଇଥିବାରୁ ଏଫ୍ଆଇଆର୍ ପଞ୍ଜିକରଣ କରିଛି । ଏହାପୂର୍ବରୁ ଦିଲ୍ଲୀ ପୋଲିସର ଆଇଏଫଏସଓ ୟୁନିଟ୍ ନୁପୁର ଶର୍ମା ଏବଂ ନବୀନ ଜିନ୍ଦଲଙ୍କ ସମେତ ୯ ଜଣଙ୍କ ବିରୋଧରେ ଏଫଆଇଆର ପଞ୍ଜିକରଣ କରିଥିଲା ।
ଯଦି ଦିଲ୍ଲୀ ପୋଲିସ୍ ସୂତ୍ରକୁ ବିଶ୍ୱାସ କରାଯାଏ, ତେବେ ଯେଉଁମାନେ ଘୃଣ୍ୟ ବୟାନ ସହିତ ପରିବେଶକୁ ନଷ୍ଟ କରୁଛନ୍ତି ସେମାନଙ୍କ ଉପରେ ଦିଲ୍ଲୀ ପୋଲିସର କଠୋରତା ଜାରି ରହିବ । ନୁପୁର ଶର୍ମା ଏବଂ ନବୀନ ଜିନ୍ଦଲଙ୍କ ସମେତ ନଅ ଜଣଙ୍କ ଉପରେ କଡା କାର୍ଯ୍ୟାନୁଷ୍ଠାନ ପରେ ଏଆଇଏମ୍ଆଇଏମ୍ ମୁଖ୍ୟ ଅସାଦୁଦ୍ଦିନ ଓୱେସି ଏବଂ ସ୍ୱାମୀ ନରସିଂହାନନ୍ଦ ଉପରେ ସୋସିଆଲ ମିଡିଆ ମାଧ୍ୟମରେ ସମାଜରେ ଘୃଣ୍ୟ ବାର୍ତ୍ତା ପ୍ରଚାର କରିବା, ମିଥ୍ୟା ତଥା ଅନିଶ୍ଚିତ ଖବର ପ୍ରଚାର କରିବା, ଧାର୍ମିକ ସୋହାର୍ଦ୍ଦ୍ୟ ଖରାପ ଲାରିବ ତଥା ଅନ୍ୟାନ୍ୟ ଧାରା ଅଧୀନରେ ମାମଲା ପଞ୍ଜିକୃତ ହୋଇଛି ।
ଏହାପୂର୍ବରୁ ବୁଧବାର ଦିନ ଦିଲ୍ଲୀ ପୋଲିସ କହିଛି ଯେ ଘୃଣ୍ୟ ବାର୍ତ୍ତା ବିସ୍ତାର କରୁଥିବା, ବିଭିନ୍ନ ଗୋଷ୍ଠୀକୁ ଉତ୍ତେଜିତ କରୁଥିବା ଏବଂ ଶାନ୍ତି ଏବଂ ଶୃଙ୍ଖଳାକୁ କ୍ଷତି ପହଞ୍ଚାଇଥିବା ପରିସ୍ଥିତି ସୃଷ୍ଟି କରୁଥିବା ଲୋକଙ୍କ ବିରୋଧରେ ଏହା ଏକ ମାମଲା ରୁଜୁ କରିଛି । ସ୍ପେଶାଲ ସେଲର ‘ଇଣ୍ଟେଲିଜେନ୍ସ ଫ୍ୟୁଜନ୍ ଆଣ୍ଡ ଷ୍ଟ୍ରାଟେଜିକ୍ ଅପରେସନ୍’ (ଆଇଏଫ୍ଏସ୍ଓ) ୟୁନିଟ୍ ଦ୍ୱାରା ପଞ୍ଜୀକୃତ ହୋଇଥିବା ଏଫ୍ଆଇଆରରେ ନୁପୁର ଶର୍ମା ଏବଂ ନବୀନ କୁମାର ଜିନ୍ଦଲଙ୍କ ସମେତ ନଅ ଜଣଙ୍କ ନାମ ରହିଛି ବୋଲି ପୋଲିସ କହିଛି ।
ଦିଲ୍ଲୀ ପୋଲିସର ସୂଚନାନୁସାରେ, ନୁପୁର ଶର୍ମା, ନବୀନ କୁମାର ଜିନ୍ଦଲ, ଶାଦବ ଚୌହ୍ୱାନ, ସବା ନାକଭି, ମୌଲାନା ମୁଫତି ନାଦିମ, ଅବଦୁଲ ରେହମାନ, ଗୁଲଜାର ଅନସାରୀ, ଅନିଲ କୁମାର ମୀନା ଏବଂ ପୂଜା ଶକୁନଙ୍କ ନାମ ଏଫଆଇଆରରେ ଅନ୍ତର୍ଭୁକ୍ତ ରହିଛି । ଆଇଏଫଏସସି ଡେପୁଟି କମିଶନର ପୋଲିସ୍ କେପିଏସ୍ ମାଲହୋତ୍ରା କହିଛନ୍ତି ଯେ ବିଭିନ୍ନ ଧର୍ମର ଲୋକଙ୍କ ବିରୋଧରେ ଏଫ୍ଆଇଆର୍ ପଞ୍ଜିକୃତ ହୋଇଛି ।
