ଉତ୍ତରପ୍ରଦେଶ ବିଧାନସଭା ନିର୍ବାଚନ : ହୋଇପାରେ ବିଏସପି-ଏଆଇଏମଆଇଏମ ମେଣ୍ଟ!
ନୂଆଦିଲ୍ଲୀ : ଉତ୍ତରପ୍ରଦେଶରେ ଆସନ୍ତାବର୍ଷ ବିଧାନସଭା ନିର୍ବାଚନ ଅନୁଷ୍ଠିତ ହେବ । ମାତ୍ର ଏହାକୁ ନେଇ ଏବେ ଠାରୁ ରାଜନୈତିକ ତାତି ଅନୁଭୂତ ହେଲାଣି । ମାୟାବତୀଙ୍କ ବହୁଜନ ସମାଜ ପାର୍ଟି (ବିଏସପି) ଏବଂ ଆସାଦୁଦ୍ଦିନ ଓୱାସିଙ୍କ ପାର୍ଟି ଏଆଇଏମଆଇଏମ ମେଣ୍ଟ କରିପାରନ୍ତି ବୋଲି ଚର୍ଚ୍ଚା ଜୋର ଧରିଛି । ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନରେ ଏହି ଦୁଇ ଦଳ ଏକାଠି ହୋଇ ନିର୍ବାଚନ ଲଢ଼ିପାରନ୍ତି ବୋଲି କୁହାଯାଉଛି । କାରଣ ଏଆଇଏମଆଇଏମ ଉତ୍ତରପ୍ରଦେଶର ରାଜ୍ୟ ସଭାପତି ସୌକତ ଅଲି କହିଛନ୍ତି ଯେ ଏହି ମେଣ୍ଟ ସମ୍ପର୍କରେ ଉଭୟ ଦଳର ନେତାଙ୍କ ମଧ୍ୟରେ ଆଲୋଚନା ଚାଲିଛି ।
ସୂଚନାଯୋଗ୍ୟ ଯେ ବିହାର ବିଧାନସଭା ନିର୍ବାଚନରେ ନିଜର ପ୍ରଦର୍ଶନକୁ ନେଇ ସମସ୍ତଙ୍କୁ ଚକିତ କରିଥିବା ଏଆଇଏମଆଇଏମ ମଧ୍ୟ ଉତ୍ତରପ୍ରଦେଶରେ ଏହାର ଭବିଷ୍ୟତ ଖୋଜୁଛି। ଗତ କିଛି ମାସ ମଧ୍ୟରେ ଏଆଇଏମ୍ଆଇଏମ୍ ସଭାପତି ଅସଦୁଦ୍ଦିନ ଓୱାସି ବିଭିନ୍ନ ରାଜନୈତିକ ଦଳର ନେତାମାନଙ୍କୁ ମଧ୍ୟ ଭେଟିଥିଲେ। ସୂଚନା ଥାଉ କି ଉତ୍ତରପ୍ରଦେଶରେ ୪୦୩ ଟି ବିଧାନସଭା ଆସନ ରହିଛି । ଗତ ବିଧାନସଭା ନିର୍ବାଚନରେ ବିଏସପି ସେଭଳି ପ୍ରଦର୍ଶନ କରିପାରି ନଥିଲା। ଦଳ ୪୦୩ଟି ଆସନରେ ଲଢ଼ିଥିଲେ ବି କେବଳ ୧୯ଟି ଆସନରେ ହିଁ ଜିତିପାରିଥିଲା । ଗତଥର ମଧ୍ୟ ଓୱାସିଙ୍କ ଦଳ ବିଧାନସଭା ନିର୍ବାଚନରେ ଭାଗ୍ୟ ପରୀକ୍ଷା କରିଥିଲା କିନ୍ତୁ ଏହାର ଖାତା ଖୋଲିନଥିଲା ।