କରୋନା ସଂକ୍ରମିତଙ୍କ ଚିକିତ୍ସା ବେଳେ ମାତ୍ରାଧିକ ଷ୍ଟିରଏଡ ବ୍ୟବହାର ବ୍ଲାକ ଫଙ୍ଗସକୁ ସକ୍ରିୟ କରିବାରେ ସହଯୋଗ କରୁଛି
ନୂଆଦିଲ୍ଲୀ : କରୋନା ସଂକ୍ରମଣ ବେଳେ ବ୍ଲାକ ଫଙ୍ଗସ ଏବେ ଦେଶର ଚିନ୍ତା ବଢ଼ାଇଛି । ଦିଲ୍ଲୀ, ମହାରାଷ୍ଟ୍ର, ଗୁଜରାଟ ପରେ ଓଡ଼ିଶାରେ ମଧ୍ୟ ବ୍ଲାକ ଫଙ୍ଗସ ଆକ୍ରାନ୍ତ ଦେଖିବାକୁ ମିଳିଛି। ଏ ନେଇ ଏମ୍ସ ନିର୍ଦ୍ଦେଶକ ଡାକ୍ତର ରଣଦୀପ ଗୁଲେରିଆ କହିଛନ୍ତି ବ୍ଲାକ ଫଙ୍ଗସରେ ଆକ୍ରାନ୍ତ ହେବା ପରେ ଅନେକଙ୍କର ମୃତ୍ୟୁ ଘୁଟିଛି। ଆଉ ଏହି ସଂଖ୍ୟା ବଢ଼ୁଛି।
ଏକ ସାମ୍ୱାଦିକ ସମ୍ମିଳନା କରି ଗୁଲେରିଆ କହିଛନ୍ତି, ଏମ୍ସରେ ମୋଟ୍ ୨୩ ଜଣ ବ୍ଲାକ ଫଙ୍ଗସ ଆକ୍ରାନ୍ତ ଚିକିତ୍ସିତ ହୋଇଛନ୍ତି। ସେଥିମଧ୍ୟରୁ ୨୦ ଜଣ କୋଭିଡରେ ଆକ୍ରାନ୍ତ। ଅନେକ ରାଜ୍ୟରେ ବ୍ଲାକ ଫଙ୍ଗସ ଆକ୍ରାନ୍ତଙ୍କ ସଂଖ୍ୟା ୫୦୦ରୁ ଅଧିକ ରହିଛି। ଏହି ରୋଗରେ ଜଣେ ଆକ୍ରାନ୍ତ ହେଲେ ଶରୀରର ନାକ ଦ୍ୱାରା ସଂକ୍ରମିତ ହୋଇ ମୁହଁକୁ ପ୍ରଭାବିତ କରିବ। ଆଉ କ୍ରମଶଃ ଏହି ରୋଗ ବ୍ରେନ ଏବଂ ଆଖିକୁ ପ୍ରଭାବିତ କରୁଛି। ପରିଣାମ ସ୍ୱରୂପ ଦୃଷ୍ଟିଶକ୍ତି ହରାଇବାର ସମ୍ଭାବନା ରହିଛି। ଏହା ଫୁସଫୁସକୁ ମଧ୍ୟ ସଂକ୍ରମିତ କରିପାରିବ ବୋଲି ସେ କହିଛନ୍ତି।
ଏହି ବ୍ଲାକ ଫଙ୍ଗସକୁ ମେଡିକାଲ ଶବ୍ଦରେ ମ୍ୟୁକୋରମାୟକୋସିସ କୁହାଯାଏ। ଏହା ମାଟି, ପବନ ଏବଂ ଖାଦ୍ୟର ଥାଏ। ଏହା ବହୁ କମ୍ ପରିମାଣରେ ଥାଏ କିନ୍ତୁ ସଂକ୍ରମିତ କରିନଥାଏ। ସେହିପରି ଏବେ ଏହି ବ୍ଲାକ ଫଙ୍ଗସ ବୃଦ୍ଧିରେ ସଂକ୍ରମିତଙ୍କ ସଂଖ୍ୟା ବଢ଼ିବା ପଛର କାରଣ ଆବଶ୍ୟକତାରୁ ଅଧିକ ଷ୍ଟିରଏଡ ବ୍ୟବହାର କରିବା। କରୋନା ସଂକ୍ରମିତଙ୍କ ଚିକିତ୍ସା ବେଳେ ମାତ୍ରାଧିକ ଷ୍ଟିରଏଡ ବ୍ୟବହାର ହେଉଥିବା ଗୁଲେରିଆ କହିଛନ୍ତି। ଯାହାକି ବ୍ଲାକ ଫଙ୍ଗସକୁ ସକ୍ରିୟ କରିବାରେ ସହଯୋଗ କରୁଛି ବୋଲି ସେ କହିଛନ୍ତି।