ଗମ୍ଭୀରଙ୍କୁ ହତ୍ୟା କରିବାକୁ ଧମକ ଦେଲା ଆଇଏସଆଇଏସ, ସୁରକ୍ଷା ବଢ଼ାଇଲା ପୋଲିସ
ନୂଆଦିଲ୍ଲୀ : ପୂର୍ବ ଦିଲ୍ଲୀ ନିର୍ବାଚନମଣ୍ଡଳୀରୁ ବିଜେପି ସାଂସଦ ତଥା ପୂର୍ବତନ କ୍ରିକେଟର ଗୌତମ ଗମ୍ଭୀରଙ୍କୁ ହତ୍ୟା ଧମକ ଦିଆଯାଇଛି । ବାସ୍ତବରେ, ଗମ୍ଭୀର ଦିଲ୍ଲୀ ପୋଲିସ ସହ ଯୋଗାଯୋଗ କରି କହିଛନ୍ତି ଯେ ତାଙ୍କୁ ‘ଆଇଏସ୍ କାଶ୍ମୀର’ ତରଫରୁ ତାଙ୍କୁ ହତ୍ୟା ଧମକ ମିଳିଛି । ଡିସିପି ସେଣ୍ଟ୍ରାଲ ଶ୍ୱେତା ଚହ୍ୱାନ କହିଛନ୍ତି ଯେ ଏହି ବିଷୟରେ ସୂଚନା ପାଇବା ମାତ୍ରେ ଆମେ ଏହି ଘଟଣାର ତଦନ୍ତ ଆରମ୍ଭ କରିଛୁ ।
ବର୍ତ୍ତମାନ ଘଟଣାର ତଦନ୍ତ ଚାଲିଛି ବୋଲି ସେ କହିଛନ୍ତି । ଏହା ବ୍ୟତୀତ ସେ କହିଛନ୍ତି ଯେ ସୁରକ୍ଷା ପାଇଁ ଗମ୍ଭୀରଙ୍କ ଘର ବାହାରେ ସୁରକ୍ଷା ବୃଦ୍ଧି କରାଯାଇଛି । ଏହା ସହିତ ସେ ତାଙ୍କୁ ହତ୍ୟା କରିବାର ଧମକ ଦିଆଯାଇଥିବା ଏକ ଇ-ମେଲ ମଧ୍ୟ ସେୟାର କରିଛନ୍ତି । ଏହି ମେଲର ପ୍ରେରକଙ୍କ ନାମ ହେଉଛି ଆଇଏସ୍ କାଶ୍ମୀର । ମେଲ ପାଇବା ପରେ ତାଙ୍କ ଘର ବାହାରେ ସୁରକ୍ଷା ବ୍ୟବସ୍ଥା କରାଯାଇଛି । କହି ରଖୁଛୁ ଯେ କ୍ରିକେଟର-ରାଜନେତା ତାଙ୍କ ଅପାରଗ ମତ ପାଇଁ ଅନେକ ସମୟରେ ନ୍ୟୁଜରେ ଥାଆନ୍ତି । ଗମ୍ଭୀର ପ୍ରତ୍ୟେକ ପ୍ରସଙ୍ଗରେ ନିଜର ମତ ପ୍ରକାଶ କରୁଥିବା ଦେଖିବାକୁ ମିଳିଥାଏ । ଅତୀତରେ ମଧ୍ୟ ସେ ଅନେକ ଥର ମଧ୍ୟ ସେ ଆତଙ୍କବାଦ ବିରୋଧରେ ବୟାନ ଦେଇଛନ୍ତି ।
ନିକଟରେ ସେ ନବଜୋତ ସିଂ ସିଦ୍ଧୁଙ୍କୁ ଟାର୍ଗେଟ କରିଥିଲେ । ସିଦ୍ଧୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ତାଙ୍କ ‘ବଡ ଭାଇ’ ବୋଲି କହିବାରୁ ଗମ୍ଭୀର କହିଥିଲେ ଯେ ପ୍ରଥମେ ଆପଣଙ୍କ ପିଲାମାନଙ୍କୁ ସୀମାକୁ ପଠାନ୍ତୁ ଏବଂ ତା’ପରେ ଏପରି ବୟାନ ଦିଅନ୍ତୁ । ଗୌତମ ଗମ୍ଭୀର ଏହା ମଧ୍ୟ କହିଛନ୍ତି ଯେ ପାକିସ୍ତାନ ପ୍ରାୟୋଜିତ ଆତଙ୍କବାଦ ବିରୋଧରେ ଭାରତ ୭୦ ବର୍ଷ ଧରି ସଂଗ୍ରାମ କରୁଛି ଏବଂ ଆତଙ୍କବାଦୀ ଦେଶର ପ୍ରଧାନମନ୍ତ୍ରୀଙ୍କୁ ତାଙ୍କ ବଡ଼ ଭାଇ ବୋଲି କହିବା ସିଦ୍ଧୁଙ୍କ ପାଇଁ ଲଜ୍ଜାଜନକ ।