ପ୍ରଥମ ଓଭରରେ ୫ ଚୌକା ଓ ୨୫ ବଲରେ ପଚାଶ, ଦିଲ୍ଲୀ କ୍ୟାପିଟାଲ୍ସକୁ ଥରାଇ ଦେଲେ ଏହି ୨୧ ବର୍ଷୀୟ ଓପନର୍
ନୂଆଦିଲ୍ଲୀ :ଆଇପିଏଲ ୨୦୨୩ ରେ କେବଳ ୧୦ଟି ମ୍ୟାଚ୍ ଅନୁଷ୍ଠିତ ହୋଇଛି ଓ ଏତେ କମ୍ ସମୟ ମଧ୍ୟରେ କିଛି ଯୁବ ଭାରତୀୟ ଖେଳାଳି ନିଜର କମାଲ ଦେଖାଇଛନ୍ତି । ବିଶେଷ ଭାବରେ ବ୍ୟାଟ୍ସମ୍ୟାନମାନେ ନିଜର ଚମତ୍କାର ପ୍ରଦର୍ଶନ କରି ବୋଲରମାନଙ୍କୁ ଧରାଶାୟୀ କରିଥିବାର ନଜର ଆସିଛନ୍ତି । ଏହି ଯୁବ ବ୍ୟାଟ୍ସମାନ ମାନଙ୍କ ମଧ୍ୟରୁ ରାଜସ୍ଥାନ ରୟାଲ୍ସର ଯୁବ ଓପନର୍ ଯଶସ୍ବୀ ଜୌସୱାଲଙ୍କ ନାମ ମଧ୍ୟ ସାମିଲ ରହିଛି, ଯିଏ ସିଜିନର ପ୍ରଥମ ମ୍ୟାଚ୍ରେ ଅର୍ଦ୍ଧଶତକ ହାସଲ କରିଥିଲେ । କିନ୍ତୁ ଯଶସ୍ବୀ ନିଜ ତୃତୀୟ ମ୍ୟାଚରେ ଆହୁରି ଅଧିକ ଆକ୍ରମଣାତ୍ମକ ମନୋଭାବ ପ୍ରଦର୍ଶନ କରି ମ୍ୟାଚର ପ୍ରଥମ ଓଭରରେ ପାଞ୍ଚଟି ଚୌକା ମାରିଥିଲେ ।
ଶନିବାର ଦିନ ଗୁଆହାଟୀରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ସିଜିନର ତୃତୀୟ ମ୍ୟାଚ୍ରେ ରାଜସ୍ଥାନ ରୟାଲ୍ସ ପ୍ରଥମେ ବ୍ୟାଟିଂ କରିଥିଲା । ଶେଷ ମ୍ୟାଚରେ ପଞ୍ଜାବ କିଙ୍ଗସ ବିପକ୍ଷରେ ରାଜସ୍ଥାନକୁ ପରାଜୟର ସମ୍ମୁଖୀନ ହେବାକୁ ପଡିଥିଲା । ସେହି ମ୍ୟାଚରେ ଜୌସୱାଲ ପ୍ରଥମ ବଲରେ ଛକା ମାରିଥିଲେ କିନ୍ତୁ ଖୁବ୍ ଶୀଘ୍ର ସେ ଆଉଟ୍ ହୋଇ ଯାଇଥିଲେ । ଦିଲ୍ଲୀ ବିପକ୍ଷରେ ମଧ୍ୟ ସେ ସମାନ ଢଙ୍ଗରେ ସେ ଇନିଂସ ଆରମ୍ଭ କରିଥିଲେ । ଯଶସ୍ବୀ ଜୌସୱାଲ ଚଳିତ ସିଜିନର ନିଜ ଦ୍ୱିତୀୟ ଅର୍ଦ୍ଧଶତକକୁ ମାତ୍ର ୨୫ ବଲରେ ପୂରା କରିଥିଲେ ।
1-2 ka 4, 4-2 ka bhi 4 – Yashaswi Jaiswal is dealing in boundaries only! #IPLonJioCinema #IPL2023 #TATAIPL | @rajasthanroyals pic.twitter.com/9EE0BmtnxB
— JioCinema (@JioCinema) April 8, 2023
ପ୍ରଥମ ଓଭରରେ ୫ ଚୌକା ଓ ୨୫ ବଲରେ ପଚାଶ :
ଓପନିଂ ପାଇଁ ପଡିଆକୁ ଓହ୍ଲାଇଥିବା ଯଶସ୍ବୀ ଜୌସୱାଲ ଦିଲ୍ଲୀ କ୍ୟାପିଟାଲ୍ସର ବାମହାତୀ ପେସର ଖାଲିଲ ଅହମ୍ମଦଙ୍କ ପ୍ରଥମ ଓଭରର ପ୍ରଥମ ବଲରେ ଚୌକା ମାରି ନିଜ ଖାତା ଖୋଲିଥିଲେ । ବାଉଣ୍ଡ୍ରି ଏଠାରେ ଶେଷ ହୋଇ ନଥିଲା ସେ ଏହି ପ୍ରଥମ ଓଭରର ୫ଟି ଚୌକା ମାରି ଦିଲ୍ଲୀ କ୍ୟାପିଟାଲ୍ସକୁ ଥରାଇ ଦେଇଥିଲେ ।
କହିରଖୁଛୁ କି, କେବଳ ଜୌସୱାଲ ନୁହଁନ୍ତି ବରଂ ଜୋସ୍ ବଟଲରଙ୍କୁ ମଧ୍ୟ ଏକ ଆକ୍ରମଣାତ୍ମକ ମନୋଭାବରେ ଦେଖିବାକୁ ମିଳିଥିଲା । ପ୍ରଥମ ଓଭରରେ ଜୌସୱାଲଙ୍କ ପାଞ୍ଚଟି ଚୌକା ପରେ, ପରବର୍ତ୍ତୀ ଓଭରରେ ଜୋସ୍ ବଟଲର୍ ମଧ୍ୟ ଏନ୍ରିକ୍ ନୋର୍କିଆଙ୍କୁ ତିନିଟି ଚୌକା ମାରିଥିଲେ ଓ ଏହି ଉପାୟରେ ପ୍ରଥମ ଦୁଇ ଓଭରରେ ରାଜସ୍ଥାନ ନଅ ଚୌକା ମାରି ତୂଫାନୀ ଆରମ୍ଭ କରିଥିଲା । ବଟଲର ଓ ଜୌସୱାଲଙ୍କ ଏହି ବିସ୍ଫୋରକ ଆରମ୍ଭ ଆଧାରରେ ରାଜସ୍ଥାନ ନିଜ ପାୱାରପ୍ଲେରେ ୬୮ ରନ୍ ସ୍କୋର କରିଥିଲା ।
ଏହି ମ୍ୟାଚ୍ ପାଇଁ ରାଜସ୍ଥାନ ଜୋସ୍ ବଟଲରଙ୍କ ରୂପରେ ଏକ ବଡ଼ ଆରାମ ପାଇଥିଲା । ଗତ ମ୍ୟାଚ୍ରେ ଇଂଲଣ୍ଡ ଅଧିନାୟକ ଆଙ୍ଗୁଠିରେ ଆଘାତ ପାଇଥିଲେ, ଏହା ପରେ ସେ ଦିଲ୍ଲୀ ବିପକ୍ଷ ମ୍ୟାଚ୍ରେ ଖେଳି ନ ପାରନ୍ତି ବୋଲି ଆଶଙ୍କା କରାଯାଉଥିଲା କିନ୍ତୁ ସେ ଠିକ୍ ସମୟରେ ଫିଟ୍ ହୋଇ ଯାଇଥିଲେ । ଏଥିସହିତ ଦିଲ୍ଲୀ କ୍ୟାପିଟାଲ୍ସ ପୃଥ୍ଵୀ ଶ’ଙ୍କୁ ଡ୍ରପ କରି ତାଙ୍କ ସ୍ଥାନରେ ମନୀଷ ପାଣ୍ଡେଙ୍କୁ ସୁଯୋଗ ଦେଇଛି ।