କୃତି ମାଟ୍ରିକ ଛାତ୍ରଛାତ୍ରୀଙ୍କୁ ୧୭ କୋଟି ଟଙ୍କା ଛାତ୍ରବୃତି ପ୍ରଦାନ
କେନ୍ଦୁଝର : କେନ୍ଦୁଝର ଜିଲାରେ ଡିଏମଏଫ ତରଫରୁ ମାଟ୍ରିକ ପରୀକ୍ଷାର କୃତି ଛାତ୍ରଛାତ୍ରୀଙ୍କୁ ପ୍ରଦାନ କରାଯାଇଛି ଛାତ୍ରବୃତି । ୩ୟ ବର୍ଷ ପାଇଁ ଚଳିତଥର ୧୧ ହଜାର ୬୦୫ ଛାତ୍ରଛାତ୍ରୀଙ୍କୁ ୧୭ କୋଟି ଟଙ୍କା ଛାତ୍ରବୃତି ପ୍ରଦାନ କରାଯାଇଛି । ଓଡିଶା ଦକ୍ଷତା ବିକାଶ ପ୍ରାଧିକରଣର ଅଧ୍ୟକ୍ଷ ସୁବ୍ରତ ବାଗଚୀ ମୁଖ୍ୟ ଅତିଥି ଭାବେ ଯୋଗ ଦେଇ କୃତି ଛାତ୍ରଛାତ୍ରୀଙ୍କୁ ଛାତ୍ରବୃତି ପ୍ରଦାନ କରିଥିଲେ । ଜିଲ୍ଲା ସଂସ୍କୃତି ଭବନରେ ଜିଲ୍ଲା ଖଣିଜ ପ୍ରତିଷ୍ଠାନ ତରଫରୁ କାର୍ଯ୍ୟକ୍ରମ ଆୟୋଜିତ ହୋଇଥିଲା । କାର୍ଯ୍ୟକ୍ରମରେ ଜିଲ୍ଲାର ସରକାରୀ ତଥା ଆଦର୍ଶ ବିଦ୍ୟାଳୟର କୃତି ଛାତ୍ରଛାତ୍ରୀ ଯୋଗ ଦେଇଥିଲେ । ଛାତ୍ରବୃତି ଗ୍ରହନ କରିବା ସହ, ଏଭଳି ଏକ ନିଆରା କାର୍ଯ୍ୟକ୍ରମରେ ଯୋଗଦେଇ ଆନନ୍ଦ ଅନୁଭବ କରୁଥିବା ଛାତ୍ରଛାତ୍ରୀ କହିଛନ୍ତି । ପିଲାମାନଙ୍କ ସହ ଭାବ ବିନିମୟ କରିବା ସମୟରେ ଭାବୁକ ହୋଇ ଯାଇଥିଲେ ବାଗଚୀ । ସେ କେନ୍ଦୁଝର ଡିଏନ ହାଇସ୍କୁଲର ଛାତ୍ର ଥିବା କହିବା ସହ ନିଜର ପିଲା ଦିନେ ସେ ବିତାଇଥିବା କଠିନ ସମୟ କିଭଳି ତାଙ୍କୁ ବଡ ଦେଖାଇଥିଲା କହିଥିଲେ । ଏହାସହ ଉଚ୍ଚ ହେବା ପାଇଁ ଛାତ୍ରଛାତ୍ରୀଙ୍କୁ କିଭଳି ପ୍ରୟାସ କରିବାକୁ ହେବ ସେ ସମ୍ପର୍କରେ ଗୁରୁମନ୍ତ୍ର ଦେଇଥିଲେ । ୩ୟ ବର୍ଷ ପାଇଁ ଡିଏମଏଫ୍ ଛାତ୍ରବୃ୍ତି ପ୍ରଦାନ କରାଯାଇଛି । ୪୦ହଜାର ଟଙ୍କାରୁ ଆରମ୍ଭ କରି ପିଲାଙ୍କୁ ୨୫ ହଜାର, ୧୫ ହଜାର ଓ ସର୍ବନିମ୍ନ ୧୦ ହଜାର ଟଙ୍କା ଲେଖାଏଁ ବୃତି ପ୍ରଦାନ କରାଯାଇଥିବା ଦିଆଯାଉଥିବା ଜିଲ୍ଲାପାଳ ଆଶିଷ ଠାକରେ କହିଛନ୍ତି । ଚଳିତବର୍ଷ ଜିଲ୍ଲାର ୧୧ ହଜାର ୬୦୫ ଜଣ କୃତି ଛାତ୍ରଛାତ୍ରୀଙ୍କୁ ୧୭ କୋଟି ଟଙ୍କା ପ୍ରଦାନ କରାଯାଇଥିବା ସେ କହିଛନ୍ତି ।