ଦୁଇ ମୋବାଇଲ ଫୋନ୍ ଲୁଟେରା ଗିରଫ
କଟକ : ସିଡିଏ ଫେଜ-୨ ଥାନା ପୋଲିସ ଦୁଇ ଜଣ ମୋବାଇଲ ଫୋନ ଲୁଟେରାଙ୍କୁ ଗିରଫ କରିବା ସହିତ ସେମାନଙ୍କ ନିକଟରୁ ରେଡମୀ ନୋଟ-୯ ଓ ୧୧ ଦୁଇଟି ମୋବାଇଲ ଫୋନ ଜବତ କରିଛି । ଗିରଫ ଅଭିଯୁକ୍ତ ଦ୍ୱୟ ନିଆଳି ରାଣୀପଡାର ମୂଳ ବାସିନ୍ଦା ତଥା ଭୁବନେଶ୍ୱର ନୟାପଲ୍ଲୀ ଥାନା ଅନ୍ତର୍ଗତ ସହିଦ ଲକ୍ଷ୍ମଣ ନାୟକ ବେହେରା ବସ୍ତି ରେଣ୍ଟାଲ କଲୋନିରେ ରହୁଥିବା ଚିନ୍ମୟ ଖୁଣ୍ଟିଆ ଓରଫ ମାନୁ ଓରଫ ମନୋଜ (୨୮) ଓ ନୟାଗଡ ଜିଲ୍ଲା ଓଡଗାଁ ଥାନା ଅନ୍ତର୍ଗତ ଗୋଡିବନ୍ଧର ମୁଳବାସିନ୍ଦା ତଥା ସହିଦ ଲକ୍ଷ୍ମଣ ନାୟକ ବେହେରା ବସ୍ତି ରେଣ୍ଟାଲ କଲୋନିରେ ରହୁଥିବା ମୁନା ଦାସ(୨୫) । ମିଳିଥିବା ସୂଚନା ମୁତାବକ ଗତ ଜୁଲାଇ ୭ ତାରିଖରେ ବୀରେନମିତ୍ର ପାର୍କ ନିକଟରେ ସୂର୍ଯ୍ୟକାନ୍ତ ପଲେଇ ନାମକ ଜଣେ ନାବାଳକ ମୋବାଇଲ ଫୋନରେ କଥାବାର୍ତ୍ତା ହେଉଥିଲା ବେଳେ ଦୁଇ ଜଣ ଏକ ବାଇକରେ ଆସି ତାଙ୍କଠାରୁ ମୋବାଇଲ ଫୋନ ଝାମ୍ପି ନେଇ ପଳାଇଥିଲେ । ଏ ସଂପର୍କରେ ଉକ୍ତ ଦିନ ସୂର୍ଯ୍ୟକାନ୍ତଙ୍କ ମା’ ଲକ୍ଷ୍ମୀପ୍ରିୟା ପଲେଇ ଥାନାରେ ଏତଲା ଦେଇଥିଲେ । ଥାନା ପୋଲିସ କେସ ନଂ ୮୦/୨୨ରେ ମାମଲା ରୁଜୁ କରି ତଦନ୍ତ ଚଳାଇ ଏହି ଦୁଇ ଅଭିଯୁକ୍ତଙ୍କୁ ଗତାକାଲି ଗିରଫ କରି ଆଜି ସେମାନଙ୍କୁ କୋର୍ଟ ଚାଲାଣ କରିଛି ।
