ଶରୀରର ଆଭ୍ୟନ୍ତରୀଣ ଅଙ୍ଗ ଗୁଡିକୁ ଗଭୀର କ୍ଷତି ପହଞ୍ଚାଉଛି ଓମିକ୍ରନ୍ : ନୂଆ ଗବେଷଣା
ନୂଆଦିଲ୍ଲୀ: କୋରୋନା ନୂଆ ଭାରିଆଣ୍ଟ ଓମିକ୍ରନ୍ ବିଷୟରେ କିଛି ଭୁଲ ବୁଝାମଣା ରହିଥିଲା । ବର୍ତ୍ତମାନ ପର୍ଯ୍ୟନ୍ତ ଏହା କୁହାଯାଉଥିଲା ଯେ ଓମିକ୍ରନ୍ କମ୍ ମାରାତ୍ମକ ଅଟେ । ଏହା ଯୋଗୁଁ ସଂକ୍ରମିତ ହୋଇଥିବା ଲୋକମାନେ ୩-୪ ଦିନ ମଧ୍ୟରେ ସୁସ୍ଥ ହେଉଛନ୍ତି । ଓମିକ୍ରନ୍ ସଂକ୍ରମଣ ଯୋଗୁଁ ମୃତ୍ୟୁବରଣ କରୁଥିବା ଲୋକଙ୍କ ସଂଖ୍ୟା ବହୁତ କମ୍ ଅଟେ । ଅର୍ଥାତ୍ ଏହା କୋରୋନାର ପୂର୍ବ ଭାରିଆଣ୍ଟଗୁଡ଼ିକ ପରି କ୍ଷତିକାରକ ନୁହେଁ । କିନ୍ତୁ ଏକ ନୂତନ ଗବେଷଣାର ଫଳାଫଳ ଏହି ସମସ୍ତ ଧାରଣାକୁ ଭୁଲ ବୋଲି ପ୍ରମାଣ କରୁଛି । ଏଥିରେ ଏହା ମଧ୍ୟ କୁହାଯାଇଛି ଯେ ଓମିକ୍ରନ୍ ଜୀବନ ନ ନେଇ ପାରେ, କିନ୍ତୁ ସଂକ୍ରମିତ ବ୍ୟକ୍ତିଙ୍କ ଆଭ୍ୟନ୍ତରୀଣ ଅଙ୍ଗକୁ ଗଭୀର କ୍ଷତି ପହଞ୍ଚାଇଥାଏ ।
ଜର୍ମାନୀର ୟୁନିଭରସିଟି କ୍ଲିନିକ୍ ହାମବର୍ଗ-ଏପେଣ୍ଡୋର୍ଫ (ୟୁକେ) ର ବିଶେଷଜ୍ଞମାନେ ଏହି ଗବେଷଣା କରିଛନ୍ତି । ଏହି ଗବେଷଣା ୟୁନିଭରସିଟି ହାର୍ଟ ଜର୍ନାଲରେ ପ୍ରକାଶିତ ହୋଇଛି । କୋରୋନା ଭୂତାଣୁ ସଂକ୍ରମଣ, ଯେକୌଣସି ଭାରିଆଣ୍ଟର ହେଉ, ଏହା ସଂକ୍ରମିତ ବ୍ୟକ୍ତିଙ୍କ ଶରୀରର ଆଭ୍ୟନ୍ତରୀଣ ଅଂଶରେ ଏହାର ଚିହ୍ନ ଛାଡିଥାଏ । ଏହା ଓମିକ୍ରନ୍ ପାଇଁ ମଧ୍ୟ ପ୍ରଯୁଜ୍ୟ, ଯାହା ଶୀଘ୍ର ସମଗ୍ର ବିଶ୍ୱରେ ବ୍ୟାପିଛି । ଯଦିଓ କୋରୋନାର ଲକ୍ଷଣ ଏହାର ସଂକ୍ରମିତରେ ଦୃଶ୍ୟମାନ ହୁଏ ନାହିଁ କିମ୍ବା ସେଗୁଡିକ ବହୁତ ଛୋଟ ଦେଖାଯାଏ । ହି ଗବେଷଣାରେ ୪୫ ରୁ ୭୪ ବର୍ଷ ବୟସର ୪୪୩ ଜଣଙ୍କୁ ସାମିଲ କରାଯାଇଥିଲା । ସମସ୍ତେ କୋରୋନାରେ ସଂକ୍ରମିତ ହୋଇଥିଲେ, କିନ୍ତୁ ଅତି ମୃଦୁ କିମ୍ବା ସାମାନ୍ୟ ଲକ୍ଷଣ ତାଙ୍କର ଥିଲା । କେତେକ ସଂକ୍ରମିତ ବ୍ୟକ୍ତି କୋରୋନାର ଲକ୍ଷଣ ମଧ୍ୟ ଦେଖାଇ ନଥିଲେ । ଏଥିମଧ୍ୟରୁ 93% ରୋଗୀଙ୍କୁ ହସ୍ପିଟାଲରେ ଭର୍ତ୍ତି ମଧ୍ୟ ହୋଇ ନ ଥିଲେ ।
କିନ୍ତୁ ଗବେଷଣା ସମୟରେ, ଯେତେବେଳେ ଏହି ସଂକ୍ରମିତମାନଙ୍କର ଆଭ୍ୟନ୍ତରୀଣ ଅଙ୍ଗଗୁଡ଼ିକ ଗବେଷଣା କରାଗଲା, ସେତେବେଳେ ଆଶ୍ଚର୍ଯ୍ୟଜନକ ଫଳାଫଳ ସାମ୍ନାକୁ ଆସିଲା । ଜଣେ ଗବେଷକ କହିଛନ୍ତି, ‘ଯେତେବେଳେ ଏହି ଲୋକମାନଙ୍କର ଫୁସଫୁସ ପରୀକ୍ଷା କରାଗଲା, ସେତେବେଳେ ଏହା ଦେଖାଗଲା ଯେ ସେମାନଙ୍କର ୩% ଶୁଖି ଯାଇଛି । ସେହିଭଳି ହାର୍ଟର ପରୀକ୍ଷଣରୁ ଜଣାପଡିଛି ଯେ ଏହାର ପମ୍ପିଂ କ୍ଷମତା ୨% ହ୍ରାସ ପାଇଛି । କେବଳ ଏତିକି ନୁହେଁ, ରକ୍ତରେ ମାର୍କର ପ୍ରୋଟିନର ପରିମାଣ ୪୧% ଅଧିକ ବୋଲି ଜଣାପଡିଛି । ବ୍ୟକ୍ତି ଚାପରେ ଥିଲେ, ଏହାର ସୂଚନା ଏହି ପ୍ରୋଟିନର ପରିମାଣ ମାଧ୍ୟମରେ ହାର୍ଟରେ ପହଞ୍ଚେ ।”
ଗବେଷଣାକାରିଙ୍କ ଅନୁଯାୟୀ, ‘କାହାଣୀ ଏଠାରେ ଶେଷ ହୁଏ ନାହିଁ। କୋରୋନା ଦ୍ୱାରା ଲକ୍ଷଣ ବିହୀନ କିମ୍ବା କମ୍ ଲକ୍ଷଣ ଥିବା ରୋଗୀଙ୍କ କ୍ଷେତ୍ରରେ କିଡନୀ କ୍ଷମତା ମଧ୍ୟ ୨% ହ୍ରାସ ପାଇଥଲା । ଆହୁରି ମଧ୍ୟ, ଗୋଡର ଶିରାରେ ବିସ୍ତାର ୩ ଗୁଣ ଅଧିକ ଦେଖିବାକୁ ମିଳିଥିଲା । ତେବେ ମସ୍ତିଷ୍କରେ ଏହି ସଂକ୍ରମଣ ଯୋଗୁଁ କୌଣସି କ୍ଷତି ହୋଇନଥିଲା ।” ଏହି ପରିପ୍ରେକ୍ଷୀରେ, ଗବେଷଣା କେନ୍ଦ୍ରର ବୈଜ୍ଞାନିକ ନିର୍ଦ୍ଦେଶକ ରାଫେଲ ଟ୍ୱେରେନବୋଲ୍ଡ କୁହନ୍ତି, ‘ଏହି ଫଳାଫଳଗୁଡିକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।”
ବିଶେଷକରି ବର୍ତ୍ତମାନର ଓମିକ୍ରନ୍ ସଂକ୍ରମଣ ଦ୍ୱାରା ସୃଷ୍ଟି ହୋଇଥିବା ପରିସ୍ଥିତିକୁ ଦୃଷ୍ଟିରେ ରଖି ୟୁକେଇର ହାର୍ଟ ସେଣ୍ଟରର ମେଡିକାଲ୍ ନିର୍ଦ୍ଦେଶକ ଷ୍ଟିଫେନ୍ ବ୍ଲାନକେନ୍ବର୍ଗ କୁହନ୍ତି, ‘ଏହି ଫଳାଫଳଗୁଡିକ ଆମକୁ ଶରୀରର ଆଭ୍ୟନ୍ତରୀଣ ଅଂଶରେ ସଂକ୍ରମିତ କରୋନା ପ୍ରଭାବକୁ ଚିହ୍ନଟ ଏବଂ ଚିକିତ୍ସା କରିବାରେ ସକ୍ଷମ କରିଛି ।’
