କରୋନା ମୁକାବିଲା ପାଇଁ ଭାରତକୁ ୧୩୫ କୋଟି ସହାୟତା ଦେବ ଗୁଗଲ
ନୂଆଦିଲ୍ଲୀ : ଭାରତରେ ଦିନକୁ ଭୂତାଣୁର ପ୍ରକୋପ ଏତେ ମାତ୍ରା ବଢିଯାଇଛି ଯେ, ଲୋକଙ୍କ ବଞ୍ଚିବା ମୁସ୍କିଲ୍ ହୋଇପଡୁଛି । ଯେମିତି ଲାଗୁଛି ଦୁଃଖର ପାହାଡ ଉପରେ ଛିଡା ହୋଇଛି ଭାରତ । ଏହାରି ଭିତରେ ସହଯୋଗର ହାତ ବଢାଉଛନ୍ତି ବଡ ବଡ ଦେଶ । ତେବେ ଭାରତକୁ ସାହାଯ୍ୟ କରିବାକୁ ଆଗେଇ ଆସିଛି ଗୁଗଲ ଭଳି କମ୍ପାନୀ । ସଂକଟ ସମୟରେ ୧୩୫ କୋଟିର ଆର୍ଥିକ ସହାୟତା ଯୋଗାଇ ଦେବାକୁ ଘୋଷଣା କରିଛି ଗୁଗୁଲ୍ ।
ଭାରତରେ କୋଭିଡ-୧୯ର ଦ୍ୱିତୀୟ ପର୍ଯ୍ୟାୟ ମହାମାରୀ ଦେଶର ସମୁଦାୟ ସ୍ୱାସ୍ଥ୍ୟ ବ୍ୟବସ୍ଥାକୁ ଅଚଳ କରିଦେଇଥିବାବେଳେ କୋଭିଡରେ ଆକ୍ରାନ୍ତ ହୋଇ ପ୍ରତିଦିନ ୨ ହଜାରରୁ ଅଧିକ ଲୋକ ପ୍ରାଣ ହରାଉଛନ୍ତି। ଏଭଳି ଏକ ସଙ୍କଟଜନକ ସମୟରେ ବିଶ୍ୱ ସମୁଦାୟ ଭାରତକୁ ସହାୟତା କରିବାକୁ ଆଗେଇ ଆସିଛନ୍ତି। ଏହି କ୍ରମରେ ବିଶ୍ୱର ଅଗ୍ରଣୀ ବୈଷୟିକ ସଂସ୍ଥା ଗୁଗଲ୍ର ସିଇଓ ସୁନ୍ଦର ପିଚାଇ ମଧ୍ୟ ଭାରତର କୋଭିଡ ବିରୁଦ୍ଧରେ ଲଢେଇ ପାଇଁ ସହାୟତା ଘୋଷଣା କରିଛନ୍ତି। ଶ୍ରୀ ପିଚାଇ ଟ୍ୱିଟ୍ କରି କହିଛନ୍ତି, ସେ ଭାରତର ଅବସ୍ଥା ଦେଖି ଅତ୍ୟନ୍ତ ଦୁଃଖିତ। ଗୁଗଲ୍ ଏବଂ ଏହାର ସହଯୋଗୀମାନେ ଡାକ୍ତରୀ ଉପକରଣ ଯୋଗାଣ ପାଇଁ ୟୁନିସେଫର ଗିଭ୍ ଇଣ୍ଡିଆ ପ୍ରୟାସ, ଅଧିକ ଆପଦାପନ୍ନ ଜନସାଧାରଣଙ୍କୁ ସହାୟତା କରୁଥିବା ସଂଗଠନ ଏବଂ ଜନସାଧାରଣଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ସୂଚନା ପ୍ରସାର କରିବା ପାଇଁ ଅନୁଦାନ ଆକାରରେ ୧୩୫ କୋଟି ଟଙ୍କା ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। ଏହି ଅନୁଦାନ ମଧ୍ୟରେ ଗୁଗଲର ଜନସେବା ଶାଖା ପକ୍ଷରୁ ୨୦ କୋଟି ଟଙ୍କା ଅନୁଦାନ ଅନ୍ତର୍ଭୁକ୍ତ। ଏଭଳି ସଙ୍କଟଜନକ ସମୟରେ ସବୁଠାରୁ ଅଧିକ ପ୍ରଭାବିତ ହୋଇଥିବା ପରିବାରଗୁଡିକୁ ସେମାନଙ୍କର ଦୈନନ୍ଦିନ ଖର୍ଚ୍ଚ ନିମନ୍ତେ ଆର୍ଥିକ ସହାୟତା ଯୋଗାଇଦେବାକୁ ଗିଭ୍ ଇଣ୍ଡିଆକୁ ପ୍ରଥମ ଅନୁଦାନ ଯୋଗାଇ ଦିଆଯିବାବେଳେ ଦ୍ୱିତୀୟଟି ଭାରତକୁ ଜରୁରୀ ଚିକିତ୍ସା ଉପକରଣ, ଅମ୍ଳଜାନ ଯୋଗାଣ, ପରୀକ୍ଷଣ ସାମଗ୍ରୀ ଆଦି ଯୋଗାଣ ନିମନ୍ତେ ୟୁନିସେଫକୁ ଅନୁଦାନ ଯୋଗାଇ ଦିଆଯିବ। ତତ୍ସହିତ ଗୁଗଲ୍ ପକ୍ଷରୁ ସଂପ୍ରତି ତାହାର କର୍ମଚାରୀଙ୍କୁ ଦାନ କରିବାକୁ ଚଳାଇଥିବା ଅଭିଯାନରେ ୯୦୦ରୁ ଅଧିକ କର୍ମଚାରୀ ଅଧିକ ଆପଦଥିବା ଜନସାଧାରଣ ଏବଂ ସଂଖ୍ୟାଲଘୁ ସମୁଦାୟଙ୍କୁ ସହାୟତା କରିବାକୁ ୩.୭ କୋଟି ଟଙ୍କା ଯୋଗାଇ ଦେଇଛନ୍ତି। ଏହିଭଳି ଭାବରେ ଗୁଗଲ ପକ୍ଷରୁ ମୋଟ ୧୩୫ କୋଟି ଟଙ୍କା ସହାୟତା ଯୋଗାଇ ଦିଆଯିବ।
