ଥାନାରେ ପହଞ୍ଚିଲେ ଓଲିଉଡ ଅଭିନେତା ବାବୁସାନ, ପଚରାଉଚରା ଆରମ୍ଭ
ଭୁବନେଶ୍ବର : ଖାରବେଳ ନଗର ଥାନାରେ ଓଲିଉଡ ଅଭିନେତା ବାବୁସାନ । ନିଜ ଜନ୍ମଦିନରେ ସେ ମାଆ ଅପରାଜିତା ମହାନ୍ତି ଓ ପାରିବାରିକ ବନ୍ଧୁ ରବି ମିଶ୍ରଙ୍କ ସହ ଜଗନ୍ନାଥ ବିହାର ଘରୁ ବାହାରି ଥାନାରେ ପହଞ୍ଚିଥିଲେ। ଥାନାରେ ହାଜର ପରେ ବାବୁସାନ୍ଙ୍କ ବୟାନ ରେକର୍ଡ କରୁଛି ପୋଲିସ । ପୋଲିସ ଇତିମଧ୍ୟରେ ପଚରାଉଚରା ଆରମ୍ଭ କରିଥିବାର ସୂଚନା ରହିଛି । ପାରିବାରିକ କଳହ କାରଣରୁ ପତ୍ନୀ ତୃପ୍ତି ଶତପଥୀ ବାବୁସାନ୍ଙ୍କ ବିରୋଧରେ ୪୯୮ ଏ ଦଫାରେ ମାମଲା ରୁଜୁ କରିଥିଲେ । କିନ୍ତୁ ବାବୁସାନ୍ ଗିରଫଦାରୀକୁ ଏଡାଇବା ପାଇଁ ହାଇକୋର୍ଟରେ ଆଗୁଆ ଜାମିନ୍ ଆବେଦନ କରିଛନ୍ତି ।
ଅଭିନେତ୍ରୀ ପ୍ରକୃତି ମିଶ୍ରଙ୍କ ସହ ସମ୍ପର୍କକୁ ନେଇ ବାବୁସାନ୍ଙ୍କ ପରିବାରରେ ବିବାଦ ସୃଷ୍ଟି ହୋଇଥିଲା । ଏପରିକି ପତ୍ନୀ ତୃପ୍ତି ବିଚ୍ ରାସ୍ତାରେ ପ୍ରକୃତିଙ୍କୁ ଆକ୍ରମଣ କରିଥିଲେ । ହେଲେ ତୃପ୍ତି ମାମଲା ରୁଜୁ କରିବା ପରେ ବାବୁସାନ୍ ଚେନ୍ନାଇ ଚାଲିଯାଇଥିଲେ । ଚେନ୍ନାଇରୁ ଦୁଇ ଦିନ ପୂର୍ବରୁ ଫେରିବା ପରେ ଅସୁସ୍ଥତା ଅନୁଭବ କରିଥିଲେ ବାବୁସାନ । କିନ୍ତୁ ଆଜି ଜନ୍ମଦିନରେ ଥାନାରେ ହାଜର ହୋଇଛନ୍ତି ବାବୁସାନ୍ । ଏଣେ ବାବୁସାନ୍ ଆଜି ନିଜର ଜନ୍ମଦିନରେ ନିଜ ଘର ବାଲକୋନିକୁ ଆସି ସମସ୍ତଙ୍କୁ ନମସ୍କାର କରିଥିଲେ। ସେ ସମସ୍ତଙ୍କୁ ଧନ୍ୟବାଦ ଜଣାଇଥିଲେ। ଏଣେ ଆଜି ସକାଳେ ତାଙ୍କ ଘର ସାମ୍ନାରେ ଫ୍ୟାନମାନଙ୍କର ଭିଡ଼ ଲାଗି ରହିଥିଲା। ସେପଟେ ଜନ୍ମଦିନରେ ପୂରା ପରିବାର ଏକାଠି ହେବାର ସମ୍ଭାବନା ସୃଷ୍ଟି ହୋଇଛି । ପତ୍ନୀ ତୃପ୍ତିଙ୍କ ସହ ଆପୋଷ ମିଳାମିଶା ନେଇ ଏକ ସୁଯୋଗ ଆସିଛି । ଶୀଘ୍ର ଉଭୟଙ୍କ ଭିତରେ ମିଳାମିଶା ହେବ ବୋଲି ପୂରା ପରିବାର ଆଶା ବାନ୍ଧିଛି । ଅନ୍ୟପଟେ ଜନ୍ମଦିନ ଅବସରରେ ମା ଅପରାଜିତା ମହାନ୍ତି ଘରେ ପୂଜାର୍ଚ୍ଚନା କରିଛନ୍ତି। ସୂର୍ଯ୍ୟ ପୂଜା ସହ ବୃନ୍ଦାବତୀଙ୍କୁ ପାଣି ଢାଳି ବାବୁଙ୍କ ଦୀର୍ଘଜୀବନ କାମନା କରିଛନ୍ତି ।
ଅଭିନେତା ବାବୁସାନଙ୍କ ବୈବାହିକ ଜୀବନରେ ଉଠିଥିବା ଝଡ଼ ଖୁବ୍ ଶୀଘ୍ର ଥମିଯିବ ବୋଲି ମନେହେଉଛି। ବାବୁସାନ୍ ମହାନ୍ତି ଓ ପତ୍ନୀ ତୃପ୍ତିଙ୍କ ଭିତରେ ଉପୁଜିଥିବା ମନୋମାଳିନ୍ୟ ଦୂର ହେବ ବୋଲି ଆଶା କରାଯାଉଛି। ବାବୁସାନଙ୍କ ମାମୁ କୁହାଯାଉଥିବା ତଥା ତାଙ୍କ ପରିବାରର ଘନିଷ୍ଠ ଅଭିନେତା ରବି ମିଶ୍ର ଏ ନେଇ ଉଦ୍ୟମ ଆରମ୍ଭ କରିଛନ୍ତି । ସମସ୍ୟାର ଆପୋଷ ବୁଝାମଣା ଲାଗି ସେ ତୃପ୍ତିଙ୍କ ସହ ଆଲୋଚନା କରିଛନ୍ତି। ଏବେ ସବୁ କିଛି ତୃପ୍ତିଙ୍କ ଉପରେ ନିର୍ଭର କରୁଛି। ତୃପ୍ତି ଚାହିଁଲେ ପୁଣି ଥରେ ତାଙ୍କ ପରିବାର ଏକାଠି ହେବ ବୋଲି ଚର୍ଚ୍ଚା ହେଉଛି । ଗଣମାଧ୍ୟମରେ ନିଜ ମତ ରଖି ତୃପ୍ତିଙ୍କ ମାଉସୀ କହିଛନ୍ତି କି ‘ସେମାନେ ଆସିଲେ। ତୃପ୍ତି ଓ ପିଲା ଭଲ ଅଛନ୍ତି କି ନାହିଁ ବୁଝିକି କଥାବାର୍ତ୍ତା ହୋଇଗଲେ। ଆଲୋଚନା ସମୟରେ ତୃପ୍ତି କହିଛି- ଆଇ ଉଇଲ୍ ୱେଟ୍ ଆଣ୍ଡ୍ ୱାଚ୍ ( ମୁଁ ଅପେକ୍ଷା କରିବି ଓ ଦେଖିବି)। ପତି-ପତ୍ନୀଙ୍କ ମଧ୍ୟରେ ଉପୁଜିଥିବା ବିବାଦର ସମାଧାନ କରିବାକୁ ତୃପ୍ତିଙ୍କ ସତ୍ୟନଗର ଘରେ ଆଉ ଜଣଙ୍କୁ ସାଙ୍ଗରେ ଧରି ପହଞ୍ଚିଥିଲେ ଅଭିନେତା ରବି ମିଶ୍ର । ସେ ତୃପ୍ତିଙ୍କ ଘରୁ ବାହାରି ଗଣମାଧ୍ୟମରେ ତାଙ୍କର ବୟାନ ଦେଇ କହିଛନ୍ତି ଯେ ‘ଖୁବ୍ ଶୀଘ୍ର ସମାଧାନର ବାଟ ବାହାରିବ’।
