ବାଲେଶ୍ୱର : ନୀଳଗିରିରେ ନୂତନ ଥାନା ଗୃହ ଉଦ୍ଘାଟିତ
ନୀଳଗିରି : ବାଲେଶ୍ୱର ଜିଲା ନୀଳଗିରିରେ ରାଜ୍ୟ ପୋଲିସ ହାଉସିଂ ବୋର୍ଡ଼ ପକ୍ଷରୁ ନିର୍ମିତ ହୋଇଥିବା ନୂତନ ଥାନା ଗୃହ ଉଦ୍ଘାଟିତ ହୋଇଛି । ପୂର୍ବାଞ୍ଚଳ ଆଇଜି ହିମାଂଶୁ କୁମାର ଲାଲ ବୁଧବାର ନୀଳଗିରି ଥାନାର ନବନିର୍ମିତ ଗୃହକୁ ମୁଖ୍ୟଅତିଥି ଭାବେ ଯୋଗଦେଇ ପ୍ରଦୀପ ପ୍ରଜ୍ୱଳନ ଓ ଫିତାକାଟି ଉଦ୍ଘାଟନ କରିଥିଲେ । ଏହି ଅବସରରେ ଜିଲା ଆରକ୍ଷୀ ଅଧୀକ୍ଷକ ସୁଧାଂଶୁ ଶେଖର ମିଶ୍ର, ନୀଳଗିରି ଏସ୍ଡ଼ିପିଓ ରିତେଶ ମହାପାତ୍ର, ନୀଳଗିରି ଆଇଆଇସି ପ୍ରଭଞ୍ଜନ ବେହେରା, ଏସ୍ଆଇ ବାସୁଦେବ ଜୟସିଂ, ଔପଦାର ଆଇଆଇସି ବିଶଦ ରାଉତରାୟ, ଖଇରାର ଆଇଆଇସି ଶ୍ରୀବଲ୍ଲଭ ସହୁ, ବରହମ୍ପୁର ଓଆଇସି ରବିନାରାୟଣ ଭୂୟାଙ୍କ ସମେତ ନୀଳଗିରିର ସମସ୍ତ ପୋଲିସ କର୍ମଚାରୀ ଉପସ୍ଥିତ ଥିଲେ ।
ରାଜାରାଜୁଡ଼ା ସମୟରୁ ନିର୍ମିତ ବହୁ ପୁରୁଣାକାଳିଆ କୋଠାରେ ନୀଳଗିରି ଥାନା ଦୀର୍ଘବର୍ଷ ହେବ ଚାଲି ଆସୁଥିଲା । ଏଥିପାଇଁ ପୋଲିସ କର୍ମଚାରୀଙ୍କ ସମେତ ଥାନାକୁ ଆସୁଥିବା ଲୋକଙ୍କୁ ବହୁ ଅସୁବିଧାରେ ସମ୍ମୁଖୀନ ହେବାକୁ ପଡୁଥିଲା । ପୋଲିସ ବ୍ୟବସ୍ଥାର ଆଧୁନିକୀକରଣ ଉଦ୍ଦେଶ୍ୟରେ ଏହି ଗୃହ ନିର୍ମିତ ହୋଇଛି । କୋଭିଡ୍ କଟକଣା ମଧ୍ୟରେ ଉଦ୍ଘାଟନୀ କାର୍ଯ୍ୟକ୍ରମ ହୋଇଥିବା ବେଳେ ଆଇଜି ଶ୍ରୀ ଲାଲ ନୂତନ ଭବେ ନିର୍ମିତ ଗୃହଟିକୁ ବୁଲି ଦେଖିଥିଲେ ।
